ابراهیم ساوالان اردبیل مرکزی حبس‌خاناسینا کؤچورولوب
خیاو (مشگین شهر) شهرینده یاشایان ژورنالیست و تورک مدنی فعال ابراهیم رشیدی‌نین (ساوالان) دیندیریلمه سورجی باشا چاتدیقدان سونرا دونن ۲۵ دی ۱۴۰۲-ده اردبیل مرکزی حبس‌خاناسینا کؤچورولوب.
بو مدنی فعالین یاخینلاری داها اؤنجه بیلدیرمیشدیلر کی، مشگین شهر ساوجیلیغینا گئتدیکدن سونرا، جناب رشیدی‌نین اردبیل اطلاعات ایداره‌سی‌نین تجرید‌خاناسینا کؤچورولدویو و ایلکین اتهامی دا ایران ایسلام جمهورییتی رژیمینه قارشی تبلیغات آدلاندیریلب
بو واختا قدر بو آذربایجانلی ژورنالیسته قارشی بو اتهاملارین ایره‌لی سورولمه‌سی‌نین سببلری باره‌ده بیلگی یوخدور.
جناب رشیدی ۹ دی گونو خیاو شهری‌نین میرکندی کندینده آتاسی‌نین ائوینده گوونلیک گوجلری طرفیندن حبس ائدیلیب و ۱۰ دی ۱۴۰۲-ده اردبیل شهری‌نین اطلاعات ایداره‌سی‌نین تجرید‌خاناسینا کؤچورولوب.
ابراهیم رشیدی تانینمیش آراشدیرماجی، ژورنالیست و مدنی فعالیدیر. او، آیدا بیر یاییملانان بایرام و یاییملانماسی قاداغان اولونان نوید آذربایجان درگی‌لری‌نین یاییم هئیتی‌نین عضوو، بلاگ یازاری و اولدوز اؤیرنجی ژورنالی‌نین باش مودیری و بولوت اؤیرنجی درگی‌سی‌نین باش یازاری اولوب.
ابراهیم ساوالان سون ۲۰ ایلده مدنی فعالیتلرینه گؤره دفعه‌‌لرله توتولوب، حبس ائدیلیب و ایشگنجه‌لره معروض قالیب.
