اؤیرنجیلره تضییق گؤسترمک اوچون “یاخشیلیق یاردیمجیلاری” قروپو یارادیلیب
حؤکومتین بیلیم‌یوردلارینی سیخیشدیرماق جهدی‌نین داوامی اولاراق، مشهد فردوسی بیلیم‌یوردو “یاخشیلیق یاردیمجیلاری” آدلی قروپ یاراتدیغینی آچیقلاییب. بو قروپون آچیقلاماسیندا بیلدیریلیر کی، اونلار اؤیرنجی و اوستادلارین بیلیم‌یوردونا گیریشینه مانع اولا بیلرلر.
بو قروپ اؤیرنجی و اوستادلارا داها چوخ تضییق گؤسترمک اوچون یارادیلیب و بیلیم‌یوردو یئتکیلیلری‌نین نظارتی آلتیندا فعالیت گؤستردیگی بیلدیریلیر.
اؤیرنجی فعاللاری اؤیرنجیلره و اوستادلارا مجبوری حجاب تطبیق ائتمک اوچون بیلیم‌یوردلاریندا گوونلیک تضییقی‌نین داوام ائتمه‌سینه توخوناراق حساب ائدیرلر کی، بو سورج حاضردا اؤلکه‌نین ان آزی ۱۰-دان چوخ بیلیم‌یوردوندا گوونلیک گوجلری و بسیج طرفیندن اؤزل قروپ یاراتماق ایله حیاتا کئچیریلیر.
تهران، شریف، علم و صنعت، آزاد،، اصفهان تکنولوژی بیلیم‌یوردو و چاباهار بیلیم‌یوردو بو بیلیم‌یوردلاری سیراسیندادیر.
سون بیر ایلده بیر چوخ بیلیم‌یوردو اؤیرنجیسی و اوستادی گئییم و باش اؤرتوسونه گؤره بیلدیریش آلمیش و یا ائیتیم و ایشدن اوزاقلاشدیریلمیشدیر. بعضی حاللاردا اونلارین باریناق حوقوقو دا اللریندن آلینیب.
