آرش صادقی یئنیدن دؤرد ایلدن چوخ حبسه محکوم ائدیلیب

آرش صادقی‌نین وکیلی‌نین وئردیگی بیلگیلره گؤره، ایرانلی مدنی و اینسان حاقلاری فعالی تهران اینقیلاب محکمه‌‌سی‌نین ۲۶-جی شؤبه‌سی طرفیندن توپلام ۴ ایل ۳ آی مدتینه حبسه محکوم ائدیلیب.

رامین صفرنیا اؤز حسابیندا یازیب کی، جناب صادقی توپلاشما و ال بیر اولماق اتهامی ایله اوچ ایل ۷ آی و رئژیمه قارشی تبلیغات فعالیتی اتهامی ایله ایسه ۸ آی حبس جزاسینا محکوم ائدیلیب.

بو حؤکم ایلکین محکمه‌‌ده وئریلیب و بو حؤکمو تئمییزه گؤتورمک اوچون هله ۲۰ گون وار.

حبس کئچمیشی اولان مدنی فعال آراش صادقی ۶ بهمنده اینقیلاب محکمه‌‌سی‌نین ۲۶-جی شؤبه‌سی‌نین قراری ایله “توپلاشماق و ال بیر اولماق” و “رئژیمه قارشی تبلیغات آپارماق” اتهامی ایله ۵ ایل ۸ آی حبس جزاسینا محکوم ائدیلمیشدی کی اعتراض سوراسی بو یئنی حؤکم اینقیلاب محکمه‌سی طرفیندن وئریلیب.

اؤنجه‌کی قراردا جناب صادقی‌نین تهرانا و قوزئی ایالتلرینه گیریشینه قاداغا قویولموشدو و آشکار ائدیلمیش اشیالارین حؤکومتین خئیرینه موصادیره‌‌ ائدیلمه‌سینه محکوم ائدیلمیشدی.

۲۰۰۸-جی ایلدن سونرا آرش صادقی مدنی و اینسان حاقلاری ساحه‌‌‌سینده فعالیتینه گؤره حبس ائدیلیب و دفعه‌‌لرله حبس جزاسینا محکوم ائدیلیب.