آذربایجانلی موعلیم جعفر ابراهیمی قزلحصار حبس‌خاناسیندان سربست بوراخیلیب
آذربایجانلی موعلیم و آنا دیلی ائیتیمی‌نین ساوونوجوسو، موعلیملر بیرلیگی شوراسی‌نین موفتیشی جعفر ابراهیمی ۸ اردیبهشت ۱۴۰۳-ده آخشام ساعتلاریندا کرجده‌کی قزلحصار زیندانیندان جزا مدتی باشا چاتدیقدان سونرا سربست بوراخیلیب.
بوندان اؤنجه داها چوخ حبس جزاسی وئرمک اوچون ساوجی بو آذربایجانلی موعلیمین آزادلیغا بوراخیلماماسی اوچون جناب ابراهیمی‌نین درمان مرخصی‌سینی حبس مدتینه آرتیرمیشدی.
جناب ابراهیمی ۹ آبان ۱۴۰۲-جی ایل چارشنبه آخشامی فیزیکی دورومونون پیسلشمه‌سی و خسته‌لیگی‌نین آغیرلاشماسیندان سونرا موعالیجه اوچون بیر آیلیق مرخصی‌یه گؤندریلدی.
موعلیملر بیرلیگی‌نین بو عضوو ۱۲ شهریور ۱۴۰۲-جی ایلده اوین حبس‌خاناسیندان ۱۲ باشقا محبوس ایله بیرلیکده قزلحصار حبس‌خاناسینداکی گوونلیک بندی آدلی آغیر جینایت محبوسلاری‌نین اولدوغو بنده کؤچورلموشدور.
اونون تعجیلی خسته‌خانایا کؤچورولمه‌سی و قبول ائدیلمه‌سینه احتیاج اولماسینا باخمایاراق، او، حبس‌خانادا پیس شرایطده یاشاییر و حبس‌خاناداکی پیس دوروما اعتراض ائتدیگینه گؤره حاکیميت اورقانلاری و حبس‌خانا ایشچیلری طرفیندن دؤیولوب.
جعفر ابراهیمی ۱۰ اردیبهشت ۱۴۰۱-ده گوونلیک گوجلری طرفیندن حبس ائدیله‌رک اوین زیندانینداکی اطلاعات ناظرلیگی‌نین تجرید‌خاناسینا (۲۰۹-جو بند) کؤچورولدو.
جعفر ابراهیمی اصلاً همدان شهریندندیر و موعلیملر حوقوقلارینی و آنا دیلی ائیتیمینی ساوونان آذربایجانلی موعلیمدیر.
