Tohid Əmir Əmini məzuniyyəti bitdiyi üçün Evin həbsxanasına qayıdıb

İranın Tehran şəhərindəki Evin həbsxanasında saxlanılan siyasi məhbus Tohid Əmir Əmini 5 günlük məzuniyyətinin bitməsi ilə Evin həbsxanasına qayıdıb.

13 dekabrda 350 milyon tümənlik zamin müqabilində məzuniyyətə buraxılan güneyli siyasi məhbus Tohid Əmir Əmini cümə günü dekabrın 18-də Evin həbsxanasına geri dönüb. Siyasi məhbus 22 ay həbsdə qaldıqdan sonra ilk dəfə məzuniyyətə buraxılmışdı.

Əmini keçən ilin fevral ayının 21-də Beynəlxalq Ana Dili Gününü qeyd etmək üçün Tehranda broşür yaymaq səbəbilə saxlanılaraq Evin həbsxanasına köçürülmüşdü.

Ötən ilin iyun ayının 23-də Tehranın İnqilab Məhkəməsinin 26-cı şöbəsində hakim İman Əfşarinin sədrliyi ilə qurulan məhkəmə iclasında Əmini “İranın milli təhlükəsizliyini pozmaq” və “İran İslam Respublikasına qarşı təbliğat aparmaq” ittihamları ilə üzləşmişdi. O, birinci ittihama görə 7 il 6 ay, ikinci ittihama görə isə 1 il 5 ay azadlıqdan məhrum edilmişdi.

Tehranın İnqilab Məhkəməsinin 26-cı şöbəsi tərəfindən Tohid Əmir Əminiyə verilən hökm Tehran Apellyasiya Məhkəməsinin 36-cı şöbəsinin sədri hakim Əhməd Zərgərin tərfindən 7 il 6 ay həbs cəzasına endirildi və daha sonra qəbul edilən yeni bir qanun çərçivəsində 5 il həbs cəzası ilə dəyişdirildi.

İran həbsxanalarında COVID-19 xəstəliyinin yayılmasından dolayı bir çox məhbus məzuniyyətə buraxılsa da, Abbas Lisani və Lətif Həsəni kimi siyasi məhbusların müvəqqəti olaraq sərbəst buraxılmalarına icazə verilmir.