25 نويابر بين الخالق قادينلارا قارشي زوراکيليغين لغوي گونو موناسيبتي ايله آدب-بيرليکين بئياننامه‌سي
نويابرين -ي 25 قادينلارا قارشي زوراکيليغين لغوي گونو، 1999-جو ايلده، ب م ت باش آسامبلئياسينين قادينلارا قارشي زوراکيليق موضوع سوندا ايجتيماعيتين معلوماتلانديريلماسي مقصدي ايله اعلان ائديلدي. بو واجيب گونو خاطيرلاماق و بؤلوشمک ايسته‌ينلر اصلينده اينسانليق اوتانجي اولان قادينلارا قارشي زوراکيليغا قارشي موباريزه يوللاريني آختاريرلار.
قيسا تاريخي باخيش
نويابر25 1960,-جي ايلده دومينيکان رئسپوبليکاسيندا ديکتاتورايا قارشي موباريزه آپاران اوچ باجي پاتريا، مينئروا و ماريا ميرابئلين جسدلري بير اوچورومون اتگينده تاپيلدي. ميرابئل قارداشلارينين تجاووز ائديلديگي و وحشيجه‌سينه اؤلدورولدويو سونرالار ديکتاتورايا قارشي موباريزه‌نين سيموولو اولدوغو کيمي اورتايا چيخديلار. بو اينکيشاف ائده‌رک 1999.جو ايلده بيرلشميش ميلتلر تشکيلاتي 25 نويابر 1999-جو ايل تاريخيني “قادينلارا قارشي زوراکيليغين آرادان قالديريلماسي اوچون بين الخالق گون” اولاراق قبول ائتمک قرارينا گلدي.
ميرابئل قارداشلاري اؤلدورولدوکدن سونرا قزئتلرده بو اؤلوملرين آوتوموبيل حاديثه سي نتيجه‌سينده باش وئرديگيني بيلديرن بير خبر چيخدي. آنجاق حقيقت گؤروندويو کيمي دئييلدي. ميرابئل قارداشلاري لاتين آمئريکاسينداکي ديکتاتور رافائل لئونيداس تروژيللويا مئيدان اوخودولار، اؤلکه‌لرينده‌کيسياسي آزادليق عزمينده موباريزه آپارديلار و بئله‌ليکله ديکتاتورا طرفيندن تقيب ائديلدي و دفعه لرله حبس ائديلدي و نهايت ماشينلاريندان ديدرگين سالينيب وه تجاوزاديلديکدن سونرايشگنجه ايله اؤلدورولدولر. داها سونرا بو قيرغين آوتوموبيل قزاسي کيمي قئيده آليندي.
1981-جي ايلده دومينيکادا لاتين آمئريکاسي قادينلار کونقرئسينده 25 نويابر، “قادينلارا قارشي زوراکيليغا قارشي موباريزه و بين الخالق همريليک گونو” قبول ائديلدي. داها سونرا 1985-جي ايلده ب م ت “25 نويابر، قادينلارا قارشي زوراکيليغين آرادان قالديريلماسي اوچون بين الخالق موباريزه اعلان ائتدي.” پئدرو مير (دومينيکان شاعيري) “آمئن دئ ماريپوساس” (کپنکلرين آميني) آدلي شعرينده اوچ باجينين اؤلدورولمه‌سيني قينادي. عيني دؤورده دومينيکان رئسپوبليکاسي و آب ش-دا ان چوخ ساتيلان مؤليف ژوليا آلوارئز، ميرابئل باجيلارينين حياتي حاقيندا رومانيني “کپنکلر دؤورونده” نشر ائتديردي. و بو کيتاب ميرابئل باجيلاريني کپنکلر کيمي مشهور ائتدي. 25 نويابر 2000-جي ايلده ميرابئل قارداشلارينين جسدلري قادين تشکيلاتلاري طرفيندن دوغولدوقلاري کنده کؤچورولدو.
گلوبال بير پروبلئم
زوراکيليق ائتنيک منشاييندن، سوسيال منشاييندن و ستاتوسوندان آسيلي اولماياراق قادينلارا قارشي ايشلنه بيلر.
25 نويابر، بوتون جمعيتلرده و مدنيتلرده باش وئرن گلوبال پروبلئم اولاراق قادينلارا قارشي زوراکيليغا ديقت يئتيريلدي. قادينلارا قارشي زوراکيليق هئچ واخت اؤزل بير پروبلئم دئييلدير، بلکه جمعيتين اينکيشافيني لعنگيدن مدنيته نئگاتيو تاثيرگؤسترن ميليونلارلا قادينا قارشي اينسانليق حاقلاريني آياق آلتيندا تاپتالايان بوتون جمعيتين پروبلئميدير. بو رقملر اؤزو دانيشير
– دونياداکي بوتون قادينلارين 35 فايزي زوراکيليقلا قارشيلاشير. آنجاق بعضي بؤلگه‌لرده حتّي 10 قاديندان 7-سي بئله حاللارا معروض قالير.
– 600 ميليوندان چوخ قادين معيشت زوراکيليغينين قاداغان ائديلمه‌ديگي اؤلکه‌لرده ياشايير. بو اؤلکه‌لرده قادينا شيددت “خصوصی مسله” حساب اولوب عاييله داخيلي پروبلئم کيمي اله آلينير و قادينلار حتّي بوشانيب پوليس يا جزا اورگانلارينا باش ووردوقدا بئله لاقئيدليکله قارشيلاشيرلار.
– بوتون جينسي تجاووزلرين 50 فايزينه قدري 16 ياشدان کيچيک قيزلارا قارشي ائديلن لر داخيلينده.
– بوگونکو قادينلارين 750 ميليونو 18 ياشينا چاتمادان ائولنديريليرلر.
– بوگونکو قادينلارين 200 ميليونو جينسي ايستيثمارا معروض قالماقدا.
– اينسان آل- وئرينه معروض قالان بوتون اينسانلارين 71 فايزي قيز و يا قاديندير. بونلارين 3/4 حيصه سي جينسي ايستيثمار اولونور.
بؤلگه‌ده و ايراندا
بير چوخ موسلمان اؤلکه‌لرد، افقانيستان و ايران و… شرعيتين غدار ايماملارن قادينا قارشي قانونلاري اوجوباتيندان دوروم قات قات آجيناجاقليدير.
بو اؤلکه‌لرده قادين جيايتلري اؤرت باس ائديليب حتّي زوراکيليغا معروض قالان قادينلار بئله بعضاً گوناهکار تانينيب داشقالا ائديلمکده‌ديرلر. بئله حاديثه لرده جينايتکارلار يوخ بلکه قيز اوشاقلاري و قادينلار گوناهکار دوروما دوشورلوب بعضاً حاياتلاري ايله بو حاديثه نين بد‌ليني اؤدمه‌لي اولورلار. قادينلار عاييله داخيلي شيددته معروض قالديقدا بئله حتّي اؤز آتالاري و قارداشلاري طرفينده قينانيب “ارينه ايطاعت ائتمه‌دين پيس قادين ” کيمي جزالانديريليب سونرا “ار” ائوينه قايتاريليرلار.
قادينلار دونيانين هاراسيندا اولور اولسون بيرلشيب کوتلوي اعتيراضلارا باش ووروب داش دئورينده قالميش جمعيتلرده معارف لشديرمه ايشلري ايله قادينلاري اييديب برابر اينسان کيمي اؤز حوقوقلاري ايله تانيش ائتمه‌ليديرلر.
آزربايجان دئموکراتيک بيرليگي – بيرليک بو موباريزه‌ده ايراندا و اؤزلليک ایله تورک بؤلگه‌لري و آزربايجاندا هر زامان قادينلارين يانيندا داياناجاق و اونلارين سسلريني دويورماقدا اليندن گلن موجاديله و موباريزه‌ني آردينا قويماياجاقدير.
ياشاسين ايناسنجيل قادين حاقلاري موباريزه‌سي
آزربايجان دئموکراتيک بيرليگي – بيرليک
25 نويابر 2019
