لومپه نیزمه حرکاتیمیزین سیرالاریندا یوخ دئمه لییک
آزربایجان میللی دئمورکراتیک حرکاتی، خالقیمیزین عدالت اوزره موباریزه سی و تورک خالقی نین گله جکده سعادتلی یاشاماسی اوچون یولا چیخمیشدیر. ائله بوناگؤره ده بو موباریزه نین ایلک گونون ده هر بیر تشکیلاتین و یا هر بیر آکتیویستین سسی و سؤزو و عین حال هر بیر آکتیویستینین داورانیش طرزی آرزو ائله دییمیز گله جه ین برپا اولماسیندا بیر آلتدیم و یا حتتا بیر تمل داش حئساب اولور و بو داشلاری بیر- بیرینین اوستونه دوزدوکجه, تورک خالقی نین خایاللاری گرچکلشمه یه دوغرو گئدیر و دئموکراتیک اساسلارا دایاناراق میللی موقدراتیمیزین الده ائدیلمه سی داها رئال و داها الوئریشلی اولور. بونون عکسی هر بیر آنتی دئموکراتیک سس و یا سؤز و البته کی هر بیر یالنیش داورانیش همان قدر میللی دئموکراتیک حرکاتیمیزین سورعتین آلیر و حرکاتیمیزین ایره لیله مه سینه همان درجه ده انگل تؤره دیر.
گینه ده سون هفته لرده توپلوموموز، تهمت و اهانت دولو دیل، شانتاژ و یالان لارلا دولو سؤزلر، فعال قادینلاریمیزا قارشی آشاغیلایان سکسیستی ادبیات حتتا تهدید ایچره ین ایفاده لر بعضی اؤزون آکتیویست آدلاندیران لارین طرفیندن سوسیال مئدیادا و حتتا تاسف له تورک/آزربایجان آدینا یایلان تله کانالاردان بئله ائیشیدیلمیش و اینسانلاریمیزی اینجیدیب کدرلندیرمیشدیر. تاسوفله تورک توپلومونون بیر کسیمی، گونئی آزربایجان دا و عمومیت له ایران دا، باشقا خالق لار کیمی گئچن 41 ایلده ایران ایسلام جمهوریتینین قارانلیق، ایرقیچی، ایرتیجاعی و سالدیریجی دیل و کولتوروندن ائتگیلنمیشی بیر دوروم دا گؤرونور. بو کسیم بیله- بیله و یا بیلمئیه- بیلمئیه نیفرت ایچه ره ین ادبیات و کولتورو حرکاتیمیزین سیرالارینا گتیرمک له، حرکاتیمیزین سیرالاریندا گرگینلییه، پولاریزاسیونا و حتی فعالاریمیزی یپراتماغا و سارسیلماسینا یول آچیرلار و حتتا تهدید ایچره ین ادبیات لا فعالاریمیزی سوسدورماغا جهد ائدیب حرکاتیمیزین سیرالاریندا سؤز آزادلیغینی قیسیتلاماغا چالیشیرلار. گئچن هفته لردهه “بیرلیک”ین سؤزچولری و عضولری حئیرت ائدیجی شانتاژلارا، ایفترالارا و اهانت لره معروض قالدیلار. آکتیو قادین لاریمیز، او جمله دن سایین دوکتور سیمین خانیم صبری شانتاژا، سایین سئویل خانیم سولیمانی سکسیستی اهانت لره و حتی ایسوئچ مجلیس نوماینده سی اولان ده یرلی سایین آیلین فاضلیان آشاغیلایجی سؤزلره معروض قالدی.
حرکاتیمیزین ایچ ماهیتی آچیسیندان و اونون دئموکراتیک اساسالارا دایانماسینا اؤنملی یاسیتما تورک قادین لارینین آکتیوجه حرکاتین سیرالاریندا ایشتراک ائتمه سی دیر.
شانتاژ، تؤهمت، اهانت و لؤمپنجه داورانیشلارین آماجی آکتیو قادین لاریمیزی سارسیلتماق و سوسدورماقدیر. بو واسیطه ایله، آزربایجان دئموکراتیک بیرلییی – بیرلیک، تورک سیاسی و مدنی آکتیویست لرینی، قادین و کیشی لری، ایچه ریده و خاریجده، بو گئریجی ادبیات و داورانیشا قارشی دور دئمه سینه چاغیریریق. شانتاژ، اهانت و آشاغیلایجی دیل، گئریجی بیر دیل دیر، لؤمپنجه داورانیش یالنیز فعالاریمیزی سارسیدان و باشقا اینسانلاری دیسکیدن بیر داورانیش دیر. هر کسه آیدین دیر کی گئریه قالمیش سالدیریجی دیل و ادبیات و لؤمپنجه داورانیش یالنیز و یالنیز ایران ایسلام جمهوریتینه خیدمت ائدیب حرکاتیمیزین سیرالاریندا قارلانلیق یئل لری اه سدیران بیر وارلیق دیر. حرکاتیمیزین اینکشافی و گوجلنمه سینین یولو اینسانجیل دیله و دئموکراتیک دوشونجه یه دایانیر و گئریجی فاکتورلاردان اولدوقجا اوزاقلاشمالیدیر. بیرلیک، خالقیمیزی و حرکاتیمیزین دئموکرات و اینسان سئور آکتیویست لرینی میللی حرکاتین سیرالاریندا لومپنیزمه دور دئمه یه دعوت ائدیر.
شانتاژا و لؤمپنیزمه سون
آزربایجان دئموکراتیک بیرلییی- بیرلیک
19.06.2020
