بهنام نورمحمدی نادارلی تهران اطلاعات ایداره‌سینه چاغیریلیب
تورک مدنی فعال بهنام نورمحمدی نادارلی، قانونسوز شکیلده تهران اطلاعات ایداره‌سینه تلفونلا چاغیریلدیغینی آچیقلاییب.
او اینستاگرام صفحه‌‌‌سینده یئر‌لشدیردیگی پایلاشیمدا بو حرکتی قانونسوز آدلاندیریب و اطلاعات ایداره‌سینه گئتمکدن ایمتینا ائده‌جه‌یینی بیلدیریب.
بو تورک فعال تلفون چاغیریشی‌نین حوقوقی دایاناغا مالیک اولمادیغینی و اونون وطنداش حوقوقلارینی پوزدوغونو وورغولاییب.
بو مسئله گوونلیک اورقانلاری‌نین داها اؤنجه تورک مدنی فعاللارینی نئجه چاغیردیقلاری ایله باغلی تنقیدلرله اوزلشدیگی بیر واختا تصادوف ائدیر.
ایران رژیمی‌نین قانونلارینا گؤره، تلفون چاغیریشلاری‌نین هئچ بیر حوقوقی دایاناغی یوخدور.
جینایت قانونونون ۱۷۰-جی ماده‌‌سینه گؤره، چاغیریش ورقه‌سی یازیلی شکیلده وئریلمه‌لیدیر. آیریجا، ۱۷۵-جی ماده‌‌نین قئیدینه اساساً، هر هانسی بیلدیریش ثنا سیستمی واسطه‌‌‌سیله ائدیلمه‌لیدیر. تلفون چاغیریشی ایجرا ائدیله بیلمز و قانونسوزدور.
Iranwire
