ایراندا الکتریک و گاز بؤحرانی سببیندن اؤلکه‌ده بیر چوخ عومومی یئر باغلی اولاجاق
داوام ائدن شدتلی سویوقلار و حؤکومتین وطنداشلارین احتیاج دویدوغو الکتریک و گازی تعمین ائده بیلمه‌مه‌سی سببیندن ایرانین بیر چوخ ایالتلرینده اوخوللار و اوفیسلر چارشنبه آخشامی، ۲۷ آذر گونو باغلی اعلان ائدیلیب.
ایسنا خبر آژانسی‌نین وئردیگی بیلگیلره گؤره، تهران والیسی‌نین عمران معاونی، چارشنبه آخشامی، ۲۷ آذر گونو تهران‌دا بوتون سويه‌‌لرده اوخوللارین آنلاین اولاجاغینی، بیلیم یوردلاری و دؤولت ایداره‌لری‌نین ده خیدمت و طب موسیسه‌‌لری استثنا اولماقلا، باغلانیلاجاغینی آچیقلاییب. .
صاباح آیریجا گیلان، اردبیل، قوزئی خوراسان، قوم، مازانداران، البورز، کوردوستان، رضوی خوراسان، گولوستان، دوغو آذربایجان، قزوین، سیمنان، زنجان و کیرمانشاه ایالتلرینده بوتون صینیفلر اوزره اوخوللار و باشقا ائیتیم مرکزلری و دؤولت ایداره‌لری باغلاناجاق.
اصفهان‌دا چارشنبه آخشامی اوفیسلرین باغلانماسی ایله یاناشی، اوخوللار و بیلیم یوردلاری هفته‌نین سونونا قدر آنلاین فعالیت گؤستره‌جک. “کئشیک” شؤبه‌لر استثنا اولماقلا، بانکلار و سیغورتا شرکتلری باغلانیب، ایجرا اورقانلاری‌نین فعالیتی ایسه اوزاقدان خیدمت یولو ایله داوام ائده‌جک. بو باغلامالارین اساس سببی انرژی توکتیمینی ایداره ائتمک و هاوانین چرکلنمه‌سینی آزالتماقدیر.
ایرانین بیر چوخ ایالتلری سویوق هاوا، الکتریک و گاز چاتیشمازلیغی سببیندن اوچونجو گوندور کی، باغلانیر.
ایالت یئتکیلیلری ایرانین چئشیدلی بؤلگه‌لرینده اوخول و اوفیسلرین باغلانماسینی “انرژی‌نین ایداره ائدیلمه‌سی” و “میلی شبکه‌ده گاز تضییقی‌نین دوشمه‌سی‌نین قارشیسی‌نین آلینماسی” آچیقلاییبلار.
ایران جمهورباشقانی مسعود پزشکیان ائولرده تئمپئراتورون ایکی درجه آشاغی سالینماسینا چاغیریب و اونون حؤکومتی‌نین بیر چوخ عضوو سون بیر نئچه گونده اوخشار ویدئو مئساژلار یاییب.
Iranwire
