بو ایلین باشیندان ۳۱ اؤیرنجی اینتیهارا جهد ائدیب
بو ایلین باشیندان ۲۰ آبانا دک ایران‌دا ان آزی ۳۱ اؤیرنجی چئشیدلی سببلردن، او جومله‌‌‌دن یوخسوللوق، مجبوری حجاب تاخماق، مجبوری نیکاح و عائله موناقیشه‌لری اوزوندن اینتیهار ائدیب. بو آکسییا سونوجوندا ۲۶ نفر حیاتینی ایتیریب، بعضی تشکیلاتلارین موداخیله‌سی ایله ۵ نفر قورتاریلیب.
هرانا خبر آژانسی‌نین وئردیگی بیلگیلره گؤره، ایرانلی اؤیرنجیلر آراسیندا اینتیهارین کریتیک دورومو داوام ائدیر. ایستاتیستیکالار گؤستریر کی، بو ایلین باشیندان ۲۰ آبانادک اؤلکه‌نین موختلیف یئرلرینده ان آزی ۳۱ اؤیرنجی اینتیهار ائدیب.
بو حرکتین اوصوللاری هوندورلوکدن آتلاماق و آلومینیم فسفید اودماغا قدر فرقلی اولوب. بو اینسانلاردان ۵ نفری یاردیمچی تشکیلات و قوروملارین موداخیله‌سی سونوجوندا ساغ قالسا دا، تأسف کی، بو اوشاقلاردان ۲۶-سی بو حرکت سونوجوندا حیاتینی ایتیریب.
هرانا اؤز راپوروندا بو اینتیهارلارین کؤکونو آراشدیریب و اوشاق و یئنی‌یئتمه‌لری بو آجی قرارلارا سؤوق ائدن عامللر کیمی “یوخسوللوق، زورونلو حجاب، مجبوری ائولیلیک و عائله پروبلئملری” کیمی فاکتورلاری تقدیم ائدیب.
بو اینسان حاقلاری سایتی داها سونرا بو دورومو ناراحات‌ائدیجی کیمی قیمتلندیره‌رک، “اؤیرنجیلر آراسیندا بو جور فاجعه‌‌‌لی حادثه‌‌‌لرین باش وئرمه‌سی‌نین فاکتورلاری‌نین بللی ائدیلمه‌سی و قارشیسی‌نین آلینماسی اوچون رسمی شخصلرین و یئتکیلی قوروملارین تعجیلی دقتینی” ایسته‌ییب.
