تورک مدنی فعال جبرئیل پاکروح تبریز جینایت محکمه‌‌سینه چاغیریلیب
تورک مدنی فعال فرهاد پاکروحون آتاسی جبرئیل پاکروح ثنا سیستمی واسطه‌‌‌سیله الکترون بیلدیریش آلاراق، ۸ آبان ۱۴۰۳-ده “یالان یایماق” اتهامینی ساوونماق اوچون تبریز جینایت محکمه‌سی‌نین ۱۰۹-جو شؤبه‌سینه چاغیریلیب.
جبرئیل پاکروح ۲۴ اردیبهشت ۱۴۰۳-ده سحر ساعتلاریندا گوونلیک قوروملاری طرفیندن حبس ائدیلمیش و تبریز شهرینده فتا پولیسی طرفیندن سورغو-سؤال ائدیلدیکدن سونرا تبریز مرکزی حبس‌خاناسینا کؤچورولموشدور.
جناب پاکروح ۲۵ اردیبهشت ۱۴۰۳-ده ۱۰۰ میلیون تومنلیک گیروو قارشیلیغیندا تبریز مرکزی حبس‌خاناسیندان آزاد ائدیلیب.
بو ایل اردیبهشت آییندا عدلیه‌نین الکترون بیلدیریش سیستمی واسطه‌‌‌سیله آلینان بیلدیریشه اساساً، جبرئیل پاکروح تقصیرلندیریلن اتهامی ساوونماق اوچون تبریز عومومی و اینقیلاب ساوجیلیغی‌نین بیرینجی شؤبه‌سینده چیخیش ائتمه‌لی ایدی.
بوندان اؤنجه جناب پاکروح اؤزونون، قارداشی‌نین و اوغلونون دورومونو فارس دیلینده بیر ویدئودا ایضاح ائتمیشدی.
جناب پاکروح، قارداشی اسد و اوغلو فرهاد پاکروح ایله بیرلیکده تبریزده جنایت پولیسی مامورلاری طرفیندن حبس ائدیله‌رک تبریزین ۱۴-جو پولیس بؤلمه‌سینه آپاریلیب و بیر گون طبی خیدمتلردن محروم ائدیلیبلر.
