اوین حبس‌خاناسیندا ساخلانیلان تورک فعاللار تهران اینقیلاب محکمه‌‌سینه چاغیریلیب
اوین حبس‌خاناسیندا ساخلانیلان تورک محبوسلار «آیاز سیف‌خواه» و «حسین پیری»، چارشنبه آخشامی ۲۰ شهریور گونو، حبسلری‌نین ۸-جی آیینا گیررکن عینی واختدا تهران اینقیلاب محکمه‌‌سی‌نین ۱۵-جی شؤبه‌سینه چاغیریلدیلار.
بو فعاللارین چاغیریش نه‌دنی محکوملارین پرونده‌سینه باخیش اولاراق آچیقلانیب.
قئید ائدک کی، بو فعاللارین پرونده‌سی اوزره محکمه سورجی حاکم ابولقاسم صلواتی‌نین باشقانلیغی ایله کئچیریله‌جک.
۱۶، ۱۷ و ۱۸ بهمن-ده آیدا صدیقی خراسانلو، فاطمه آتشی خیاوی، کرامت روحنواز، علیرضا شیرزاد کوچنقی، امیرعلی برادران، یاشار حسین زاده، لطفعلی جباری، سهیلا اصغری، مرتضی پروین جدا، ودود اسدی، سالار طاهر افشار، سعید جمال زاده، باقر حاجی زاده، آیاز سیف خواه، سعید مینایی، کمال نوری، آراز امان، طاهر نقوی، سعید دوستان، سلیمان «آیدین» محمدی، کرم مردانه مستعلی بیگلو و عبدالله واحدی، اردبیل، خیاو «مشگین شهر»، رشت، اورمیه، تبریز، اسلامشهر تهران، کرج و آستارا، شهرلرینده، اطلاعات گوجلری طرفیندن حبس ائدیلیب.
بو واختا کیمی، بو فعاللاردان بعضیلری محکمه سورجی‌نین سونونا قدر مووقتی اولاراق اوین حبس‌خاناسیندان گیروو قارشیلیغیندا سربست بوراخیلیبلار و بعضی فعاللار ۸ آیدیر هله ده اوین حبس‌خاناسیندا، پیس شرایطده ساخلانیلیرلار.
