قادینلار تراکتور-پرسپولیس ایونونو ایزله‌مک اوچون استادیوما گیره بیلمه‌یه‌جک
تراکتور کلوبونون آچیقلاماسیندا بیلدیریلیر کی، قادینلارین “تراکتور” و “پرسپولیس” کوماندالاری‌نین قارشیلاشماسینی ایزله‌مک اوچون تبریزده‌کی سهند (یادگار) استادیومونا گیریش حوقوقو اولمایاجاق.
“تراکتور”ون بیلیت ساتیشی سیستمی‌نین رئیسی “امیر جابری” مطبوعاتا آچیقلاماسیندا قادینلارین استادیوما گیرمک حوقوقونون اولمادیغینی و بئله‌لیکله، بو اویوندا قادینلارین یئری‌نین “پرسپولیس” طرفدارلاری‌نین ایختیاریندا اولاجاغینی بیلدیریب.
او، تبریزین سهند استادیومونا قادینلارین اولماسینی بیر داها قاداغان ائدن قوروم، تشکیلات و یا شخصین آدینی چکمسه ده، قطعیتله بیلدیریب کی، قادینلار اویونا باخماق اوچون استادیوما گلمه‌مه‌لیدیر.
فیفا و آسیا کنفدر کنفدراسیونونون قایدالارینا گؤره، قادینلارین هر هانسی سببدن استادیوما گیریشینه مانع اولماق قایدالارا ضدیر.
ایران ایسلام جمهورییتی فوتبول فدراسیونو و گوونلیک قوروملاری بعضی لیگ هفته‌لرینده و اؤنملی اویونلاردا قادینلارین استادیوملارا گیریش قاداغاسینی نورماللاشدیرماقلا قادینلارین استادیوما گیریشینی قاداغان ائدن قانونو ایران فوتبولونا قایتارماغا چالیشیرلار.
“ماوی قیز” لقبلی “سحر خدایاری‌نین” اؤزونو یاندیرماسیندان سونرا فیفا قادینلارین اؤلکه‌یه گیریشی اوچون فوتبول فدراسیونو و ایران ایسلام جمهورییتی حؤکومتینه تضییقلری بیر قدر ده آرتیرماق قرارینا گلیب. بو قرارا سبب اولوسلارآراسی اعتراضلار و تپکیلر و ایرانلی قادینلارین ایران فوتبولوندا قادینلارا قاداغا و محدودیتلره دقت چکمک جهدلری اولوب.
بونونلا بئله، فوتبول فدراسیونو هله ده بیر چوخ اویونلاردا قادینلارین استادیوما گیریشینی قاداغان ائدیر.
