قاضی‌زاده هاشمی: اسرائیلین باشچیلاریندان بیری اؤلدورولمه‌لیدیر
شهید وقفی‌نین رئیسی امیر حسین قاضی‌زاده هاشمی تهراندا هنیه‌نین اؤلدورولمه‌سی‌نین تلافی‌سی‌نین اؤده‌نیلمه‌سی اوچون اسرائیلین “اسماعیل هنیه” ایله عینی سويه‌‌ده اولان اساس لیدرلریندن بیری‌نین اؤلدورولمه‌سی‌نین لازیم اولدوغونو بیلدیریب.
حماسین سیاسی لیدری هنیه تهراندا اؤلدورولدوکدن سونرا ایران‌دا چئشیدلی شخصیتلر قانا سوسامیشلیق و قیصاص‌دان دانیشیبلار. او جومله‌‌‌دن ایسلام جمهورییتی‌نین لیدری علی خامنه‌ای دئییب: اسرائیل بو حرکتی ایله آغیر جزا اوچون زمین حاضرلادی.
هنیه‌نین دفن مراسیمینده قاضی‌زاده هاشمی وورغولادی کی، جاواب عینی سويه‌‌ده اولمالیدیر و حماس لیدرلریندن بیری اؤلدورولدوکده، اسرائیلین اساس لیدرلریندن بیری اؤلدورولمه‌لیدیر.
اسماعیل هنیه‌نین اؤلوموندن سونرا چئشیدلی شخصیتلر بو حادثه‌‌‌یه گؤره اسرائیلی گوناهلاندیرسالار دا، اسرائیل رسمیلری، او جومله‌‌‌دن اسرائیلین باش ناظری بنیامین نتانیاهو ایندییه قدر مسئله ایله باغلی آچیقلاما وئرمکدن ایمتینا ائدیبلر.
