تهراندا ساخلانیلان ۳ تورک مدنی فعالین کیملیگی بللی اولوب
۱۴۰۳-جو ایل اردیبهشت آیی‌نین سونلاریندا تهراندا یاشایان تورک مدنی فعاللار محمد عبدی اسکانلو، حسین برماه و امید شاهی اینقیلاب کئشیکچیلری اطلاعاتی طرفیندن حبس ائدیله‌رک اوین حبس‌خاناسی‌نین ۲-جی بندینه کؤچورولوبلر.
بیر نئچه گونلوک حبسدن سونرا امید شاهی گیروو قارشیلیغیندا سربست بوراخیلدی، محمد عبدی اسکانلو و حسین برماه آدلی ایکی باشقا فعال ایسه دونن، ۳۰ خرداد ۱۴۰۳-جو ایلده سورغو-سؤال مدتی باشا چاتدیقدان سونرا اوین حبس‌خاناسی‌نین ۴-جو بؤلمه‌سینه کؤچورولدو.
بو آذربایجانلی مدنی فعاللارین اتهاملاری محکمه سورجی‌نین ایلکین مرحله‌‌‌سینده “قانونسوز قروپلارا عضو اولماق” و “ایران ایسلام جمهورییتینه قارشی تبلیغات” اتهاملاری ایره‌لی سورولوب و موستنطیق طرفیندن بو فعالارین اتهاملارینا دایر سانال اورتامداکی فعالیتلر قئید ائدیلیب.
سون ایللرده تورک شهرلرینده آذربایجانلی مدنی فعاللارا قارشی تضییقلر چوخلوجا آرتمیش و گوونلیک گوجلری طرفیندن عائله‌‌‌لره قارشی تهدیدلر اونلاری اوشاقلاری باره‌ده بیلگی یایماقدان چکیندیریب و آز سایدا چاغیریش، تهدید و ایشگنجه بیلگیلری عائله‌لر طرفیندن بیلدیریلیب.
