محمد شباهتی اوین حبس‌خاناسیندان سربست بوراخیلیب
اؤیرنجی تورک فعال محمد شباهتی گیروو قارشیلیغیندا اوین حبس‌خاناسیندان سربست بوراخیلیب.
اینسان حاقلاری مرکزی اهرازین وئردیگی بیلگیلره گؤره، بو تورک فعال، بازار ائرته‌سی ۲ بهمن ۱۴۰۲-ده ۹۰۰ میلیون تومنلیک گیروو قارشیلیغیندا مووقتی اولاراق اوین حبس‌خاناسیندان سربست بوراخیلیب.
محمد شباهتی قیابی اولاراق اونا وئریلن ۵ ایللیک حبس جزاسینی ایجرا ائتمک اوچون ۱۹ دی ۱۴۰۲-ده حبس ائدیلمیشدی.
بوندان اؤنجه ۱۶ آذر ۱۴۰۱-جی ایلده تهران بیلیم‌یوردونون ایچینده “قادین، حیات و آزادلیق” آدلی عومومی اعتراض آکسییالاری زامانی گوونلیک گوجلری‌نین دؤیمه‌سی ایله یاناشی، محمد شباهتی حبس ائدیلمیش و ۳۳ گونلوک حبسدن سونرا، محکمه‌یه قدر مووقتی اولاراق گیروو قارشیلیغیندا سربست بوراخیلمیشدیر.
بو ایلین فروردین آییندا تهران بیلیم‌یوردونون اینتیظام کومیته‌سی طرفیندن جناب شباهتی ایکی دؤنم ائیتیمدن محروم ائدیلیب و بو دا اینتیظام کومیته‌سی‌نین تئمییز ایجلاسیندا قیابی اولاراق تصدیقله‌نیب.
اؤیرنجیلر و اؤیرنجی تشکیلاتلاری جناب شباهتی‌یه دستک اولدوقلارینی بیر مکتوبلا بیلدیریبلر.
