ایشدن چیخاریلان تیجارت اوتاغی‌نین رئیسی خامنه‌ای‌یه اهانت ائتمک اتهامی ایله موحاکیمه ائدیلیب
ایشدن چیخاریلان تیجارت اوتاغی‌نین رئیسی حسین سلاح‌ورزی ایسلام جمهورییتی‌نین قوروجوسو و لیدرینه اهانت ائتمک اتهامی ایله موحاکیمه اولونوب.
جناب سلاح‌ورزی ۲۴ دی ۱۴۰۲-جی ایل بازار گونو “اکو ایران” سایتینا وئردیگی موصاحیبه‌ده موحاکیمه اولوندوغونو تصدیقله‌دی.
بو باره‌ده “اکو ایران” یازیب، تهران عومومی و اینقیلاب ساوجیلیغی‌نین معاونی مؤوجود بیلگیلره اساسلاناراق، موستنطیق طرفیندن چاغیریش ورقه‌سی وئریلمه‌سی و حسین سلاح‌ورزی‌یه قارشی خمینی و خامنه‌ای‌یه اهانت ائتمک اتهامی ایله ادعانامه چیخاریلماسی باره‌ده امر وئریب و سلاح‌ورزی تهران اینقیلاب محکمه‌‌سینده موحاکیمه اولونور.
اکو ایرانین خبرینه گؤره، تهران اینقیلاب محکمه‌‌سی‌نین ۲۹-جو شؤبه‌سینده حسین سلاح‌ورزی‌نین محکمه‌‌سی داوام ائدیر و محکمه‌‌نین حؤکمو هله آچیقلانماییب.
بو ایل آبان آیی‌نین باشیندا ایران ایسلام جمهورییتی‌نین حؤکومتینه یاخین مئدیا ایران تیجارت اوتاغی‌نین سئچکیلرینه نظارت اوزره عالی شورانین حسین سلاح‌ورزی‌نین بو اوتاغین باشچیلیغیندان کنارلاشدیریلماسی ایله باغلی قراری‌نین بیلدیریشینی اعلان ائدیب.
۱۴۰۲-جی ایلین خرداد آییندا حسین سلاح‌ورزی ایران تیجارت اوتاغی‌نین ۱۰-جو دؤورونون باشقانی سئچیلدی. کئچن ایل ایران خالقی‌نین اعتراضی زامانی او، تویییترده “قادین، حیات، آزادلیق” اعتراضلارینی دستکله‌ین بعضی یازیلار یازمیشدی.
بو مسئله اینقیلاب کئشیکچیلرینه یاخین بعضی مئدیانین گؤزوندن قاچمادی و “تسنیم” خبر آژانسی اونو سئچکیدن بیر گون سونرا اینقیلاب قارشیتی و تخریباتچی کیمی قله‌مه آلدی.
مهر خبر آژانسی دا ادعا ائدیب کی، جناب سلاح‌ورزی تیجارت اوتاغی‌نین ایداره هئیتینه سئچکیلر کئچیرمزدن اؤنجه اطلاعات ناظرلیگی طرفیندن صلاحیتی رد ائدیلمیشدی.
