اؤلکه‌ده اولوسال ماتم اعلان ائدیلمه‌سی؛ پوتین کیرماندا باش وئرن حادثه ایله باغلی خامنه‌ای‌یه باش‌ساغلیغی وئریب
کیرمان شهرینده قاسم سلیمانی‌نین ایلدؤنومو ایله باغلی حؤکومت مراسیمینده تؤره‌دیلن ایکی پارتلاییشین و بو مراسیمده اونلارلا اینسانین اؤلدویو و یارالانماسی‌نین آردینجا روسیا جمهورباشقانی ولادیمیر پوتین بو حادثه‌‌‌سینی پیسله‌یرکن، علی خامنه‌ای‌یه باش‌ساغلیغی وئریب.
بیلگیلره گؤره، بو خبرین یازیلدیغی آنا قدر اؤلکه‌نین اورژانسی ۱۰۳ نفرین اؤلدویونو، اونلارلا اینسانین یارالاندیغینی آچیقلاییب. قئیری-رسمی بیلگیلره گؤره، اؤلنلرین بعضیلری قادین و اوشاقلاردیر. اؤلکه‌نین اورژانسی کیرماندا باش وئرن حادثه‌‌‌ده یارالانان ۴۳ نفرین آدینی آچیقلاییب.
بو حادثه‌‌‌نی تررورچو آدلاندیران داخیلی ایشلر ناظری “کیرماندا تؤره‌دیلن ترور حادثه‌‌‌سی‌نین باش وئرمه سببی‌نین آراشدیریلدیغینی” بیلدیریب. او آرتیریب: بیزیم الیمیزده بیلگیلریمیز وار، لاکین تصدیقلنن کیمی اینسانلارا بیلگی وئره‌جییک. اینسانلار شایعه‌لره فیکیر وئرمه‌مه‌لیدیرلر.
احمد وحیدی ایکینجی پارتلاییشدا اؤلن و یارالانانلارین چوخونون قضایا اوغرادیغینی و بوندان سونرا یارالیلارین و اؤلنلرین جسدلری‌نین قیزیل آی و تعجیلی یاردیمین ایشتیراکی ایله خسته‌خانایا آپاریلدیغینی بیلدیریب.
عینی زاماندا، اینقیلاب کئشیکچیلرینه یاخین بیر مئدیا بیلگیلی قایناغا ایستناداً؛ کیرماندا باش وئرن حادثه‌‌‌ده “۴ پولیس امکداشی” نین اؤلدوغونو یازیب. بعضی قایناقلار تسنیم موخبیرینه بیلدیریبلر کی، کیرمان شهیدلر گولزاری‌نین گیریشینده ایکی بومبالی چانتا اولوب و بو حادثه‌‌‌نین سببکاری و یا ایجراچیلاری، گؤرونور کی بومبالاری اوزاقدان ایداره‌ائتمه واسطه‌‌‌سی ایله ایشه سالیبلار.
کیرماندا باش وئرن تررور حادثه‌‌‌سیندن سونرا حؤکومت اولوسال ماتم اعلان ائدیب.
بو پارتلاییشلاردان درحال سونرا روسیا جمهورباشقانی و ایسلام جمهورییتی‌نین موتفیقی اولان پوتین مئساژیندا بو هوجوملاری پیسله‌یه‌رک، کیرمانداکی پارتلاییشینی علی خامنه‌ای‌یه باش‌ساغلیغی وئریب. تورکیه جمهورباشقانی رجب طیب اردوغان دا مئساژیندا ایران خالقینا باش‌ساغلیغی وئریب.
پوتینین خامنه‌ای ایله دردلشمسینه باخمایاراق، سوسیال شبکه‌لرده بیر چوخ قوللانیجی‌نین تپکیسی فرقلی اولوب.
ایران اینسان حاقلاری تشکیلاتی‌نین مودیری محمود امیری مقدم بو حادثه‌‌‌یه تپکی وئره‌رک کیرمان خالقی‌نین نؤوبتی دفعه “ترورون قوربانی” اولدوغونو بیلدیریب و بو هوجومو پیسله‌ییب و دئییب: ایران خالقی ثمره‌‌‌سیز و فاسد حؤکومتین قوربانیدیر کی، سؤزده گوونلیک گوجلری گوونلیگی تعمین ائتمک یئرینه، اؤز قایناقلاریندان ایستیفاده ائده‌رک، فرقلی فیکیرلره گؤره وطنداشلارا ظولم ائدیر”.
او، اعداملارین و باسقیلارین آرتماسی ایله باغلی خبردارلیق ائدیب و دئییب: حؤکومتین کئچمیشده اولدوغو کیمی بو تررورو بهانه ائده‌رک وطنداشلارا قارشی اعدام و باسقیلاری آرتیراجاغیندان ناراحاتام”.
