ایران بانکلارینا چوخلو میقداردا بورجلو اولان محمد رستمی صفا ۱۵ ایل حبس جزاسینی چکمک اوچون حبس‌خانایا کؤچورولوب
عدلیه‌‌‌نین خبر اورقانی اولان “میزان” خبر آژانسی “بانکلارا سوپر بورجلو”نون ۱۵ ایللیک جزاسینی چکمک اوچون حبس‌خانایا کؤچورولدویونو آچیقلاییب.
بو خبره گؤره، “اؤزل” سئکتوردا فعالیت گؤستردیگی دئییلن شخصین کیملیگی “محمد رستمی صفا” اولاراق آچیقلانیب و بو شخصین ۱۳۸۲-۱۳۹۲-جی ایللر آراسیندا فرقلی شرکتلر قوراراق ایرانین اوچ بؤیوک بانکیندان واملار آلیب و بو پوللاری ۱۳۹۳–جو ایله قدر گئری قایتاریلمادیغی اوچون او بانکلار طرفیندن ۱۳۹۹-جو ایلده شیکایته معروض قالمیشدی.
محمد رستمی صفانین اتهاملاری آراسیندا “اؤلکه‌نین پول-ارز سیستمی‌نین پوزولماسیندا ایشتیراک ائتمک” و “ساختا سندلر تقدیم ائتمکله ادعاچی بانکلارا دله‌دوزلوق ائتمک” ده وار و او، ۱۵ ایل مدتینه آزادلیقدان محروم ائدیلیب و هر هانسی دؤولت خیدمتلریندن محرومدور.
سون گونلر ایراندا بیر نئچه ماليه فساد، او جومله‌‌‌دن آچیق بازاردا ایدخال اوچون دؤولتدن آلدیغی دلاری ساتدیغی ادعا ائدیلن چای ایدخالچی شرکتی‌نین نئچه میلیارد دلارلیق فسادی ایله باغلی بیر نئچه خبر یاییلیب.
بعضی تنقیدچیلر دئییرلر کی، ۱۳۹۸-۱۴۰۱-جی ایللرده بو فسادلار باش توتارکن عدليه باشچیسی “ابراهیم رئیسی” ایدی کی، ایندی حؤکومتی بو پوزونتونو اوزه چیخاردیغینی ادعا ائدیر
