سینا یوسفی اصفهان ائوی پرونده‌سی ایله باغلی بیلگی یایدیغی اوچون حبس جزاسینا محکوم ائدیلیب
اصفهان اینقیلاب محکمه‌‌سی‌نین ۶-جی شؤبه‌سی وکیل و دوغو آذربایجان ایالتی‌نین اینسان حاقلاری کمیسیونونون کئچمیش معاونی “سینا یوسفی” بیر ایل حبسه محکوم ائدیب.
ایران‌وایرین الده ائتدیگی خبره گؤره، اصفهان اینقیلاب محکمه‌‌سی‌نین “رسول ذاکری اصفهانی”نین باشچیلیق ائتدیگی آلتینجی شؤبه‌سی سینا یوسفی‌نی “رئژیمه قارشی تبلیغات” اتهامی ایله بیر ایل مدتینه آزادلیقدان محروم ائدیب. بو حوقوق ساوونوجوسو بوندان اؤنجه ایکس صفحه‌‌‌سینده بونونلا باغلی یازمیشدی کی، بو پرونده بو وکیلین “اصفهان ائوی” پرونده‌سی ایله باغلی بیلگی وئرمه‌سی و بو پرونده اوزره تقصیرلندیریلن شخصلره قارشی اعدام و حبس حؤکملری‌نین وئریلمه‌سینه اعتراض ائتدیگینه گؤره آچیلیب.
۱۴۰۱-جی ایلین پاییزیندا قادین، حیات، آزادلیق اعتراضلاری ایله عینی واختدا و اصفهانین موحافیظه ائوی مئیدانیندا حؤکومت مامورلارینا آچیلان آتش حادثه‌‌‌سیندن سونرا بیر نئچه وطنداش گوونلیک گوجلری طرفیندن حبس ائدیلدی. بونونلا علاقه دار اولاراق، حبس ائدیلنلردن ۵ نفری موباحیثه‌لی بیر پرونده اوزره عدالتلی موحاکیمه اولونمادان اعدام و حبس جزاسینا محکوم ائدیلیب. بو حالدا «صالح میرهاشمی»، «مجید کاظمی» و «سعید یعقوبی»، ۱۴۰۲-جی ایل ۲۹ اردیبهشتده سحر ساعتلاریندا اعدام ائدیلدی. سینا یوسفی بو پرونده‌نین ایجرعاتینا اعتراض ائدن و تقصیرلندیریلن شخصلرین عدالتلی موحاکیمه اولونماسینی طلب ائدن حوقوق ساوونوجولاریندان بیری اولوب.
بو، ۱۴۰۱-جی ایلده عومومی اعتراضلار باشلایاندان سونرا سینا یوسفی‌نه قارشی چیخاریلان اوچونجو حؤکمدور. او، دوغو آذربایجان وکیللر بیرلیگی‌نین اینسان حاقلاری کمیسیونوندا عومومی اعتراض آکسییالاریندا محبوسلارین ساوونماسی کومیته‌سی یارادیلدیقدان سونرا حبس ائدیلن دؤرد وکیلدن بیریدیر. بو حوقوق ساوونوجوسو داها اؤنجه ایکی آیری حؤکمله حبس، جریمه و سوسیال جزالارا محکوم ائدیلیب.
