تبریزلی اوشاق آدینین تورکجه اولدوغونا گؤره کیملیک آلا بیلمیر
تبریزین قئیدیات ایداره‌سی تورک اوشاغا آدینین “بایجان” اولدوغو اوچون کیملیک وئرمکدن ایمتینا ائدیب.
بو باره‌ده بایجانین آتاسی شاعر و مدنی فعال رامین جبرائیلی محکمه‌‌یه باشوردوغونو، آنجاق هئچ بیر موثبت سونوج آلا بیلمه‌دیگینی دئییب.
ایرانین وطنداشلیق قئیدیاتی تشکیلاتی تصدیقلنمیش آدلاری‌نین لیستینی یاییملایاراق وطنداشلاردان بو آدلاری اوشاقلاری اوچون سئچمه‌لرینی ایسته‌ییر. والیدئینلر طرفیندن سئچیلن آد قئیدیات ایداره‌سی طرفیندن تکلیف اولونان لیستدن کناردا اولدوقدا، سئچیلمیش آد آراشدیریلماق اوچون بو تشکیلاتین (آد کومیته‌سی‌نین) ایداره هئیتینه گؤندریله‌جک و تصدیق ائدیلمه‌دیگی تقدیرده آدین سئچیلمه‌سینه ایجازه وئریلمه‌یه‌جک.
تصدیقلنمیش آدلار لیستینده سیاسی و دینی محدودیتلر و فیکیرلر، بیر چوخ وطنداشی اینسان حوقوقلارینا ضد اولاراق، اوشاقلارینا دینی، ائتنیک و یا مدنی کیملیکلرینه گؤره آد وئرمکدن محروم ائدیر.
والیدئینلر طرفیندن سئچیلن آدلارا کیملیک وئریلمه‌مه‌سی و قئیدیات ایداره‌سی‌نین قارشی چیخماسی ایلک حال دئییل. بوندان اؤنجه ۲۰۲۰-جی ایلده اردبیللی اوشاق “آییل” اوچون کیملیک وئریلمه‌مه‌سی و آییلین آتاسی‌نین شهر قئیدیات ایداره‌سی قارشیسیندا اعتراض ائتدیگی بیر ویدئونون یاییلماسی “آییل کامپانییاسی‌نین” باشلانقیج نؤقطه‌‌‌سی ایدی. بو کامپانییادا آییلین والیدئینلری‌نین بو اوشاق اوچون کیملیک آلامادیقلاری اعتراضینا علاوه، اوخشار بیر مانع یاشایان باشقا آذربایجانلی عائله‌‌‌لر ده یاشادیقلاری تجروبه‌لری سوسیال شبکه‌لرده درج ائتمه‌یه باشلادیلار. بونونلا یاناشی ایرانلی بلوچ، کورد و عرب عائله‌‌‌لری ده سوسیال مئدیادا پایلاشیم ائده‌رک اوشاقلاری اوچون کیملیک آلارکن قارشیلاشدیقلاری عینی مانع‌لری تنقید ائتمیشدیلر.
