استاندارت اولمایان اتومبیللر؛ “ایراندا اوچونجو اؤلوم نه‌دنی”
مجلیسین شهر ایداره‌چیلیگی فراکسیونونون رئیسی ۴ آبان ۱۴۰۲-ده بازار گونو ایسنا خبر آژانسینا وئردیگی موصاحیبه‌ده دئییب کی، “یول قضالاریندا اؤلنلرین سایی عومومی اؤلوملرین یوزده ۶.۵-نی تشکیل ائدیر و بو دا اؤلکه‌ده ان چوخ گؤرولن اوچونجو اؤلوم نه‌دنیدیر” دئدی.
“محسن پیرهادی”نین سؤزلرینه گؤره، “اتومبیل و اونلارین یدک پارچالاری‌نین اورتیمینده استاندارتلارا عمل ائدیلمه‌مه‌سی” بو قضالارین اساس سببلریندن بیریدیر.
ایراندا “اتومبیل یدک پارچالاری‌نین یوزده ۹۰-دان چوخونون” استاندارتا اویغون حاضرلانماماسینا توخونان بو ملت وکیلی دئییب: چوخلو یدک پارچالارین اورتیمی ایله باغلی تعلیمات یوخدور و بو پارچالارین اورتیمی و پایلانماسینا نظارت یوخدور.
عوموم‌دونیا ساغلیق تشکیلاتی‌نین راپورونا گؤره، چئشیدلی اؤلکه‌لرده یول قضالاری‌نین ديری عومومی داخیلی محصولون تخمیناً یوزده ۳-نو تشکیل ائدیر. محسن پیرهادی ایراندا بونون باها باشا گلدیگینه دقت چکدی و بیلدیردی کی، دونیا اوزره اورتا گؤستریجیدن ایکی قات چوخدور و عومومی داخیلی محصولون یوزده ۶-۷-سینی تشکیل ائدیر.
ایسلام شوراسی‌نین شهر ایداره‌چیلیگی فراکسیونونون رئیسی وورغولاییب کی، تکجه اؤتن ایل اؤلکه‌ده قضالارین خسارتی ۴۹ مین میلیارد تومن اولوب.
عدلي طب تشکیلاتی‌نین ۲ آبان ۱۴۰۲-ده یاییلان راپورونا گؤره اساساً، ایراندا بو ایلین ایلک ۶ آییندا یول قضالاری قوربانلاری‌نین سایی کئچن ایلین عینی دؤورو ایله موقایسه‌‌ده یوزده ۸.۲ آرتیب.
بو راپورونا گؤره، ۱۴۰۲-جی ایل فروردینین باشیندان شهریورین سونونا قدر یول قضالاریندا ۱۰ مین ۷۲۰ نفر اؤلوب.
محسن پیرهادی بازار گونو وئردیگی آچیقلامادا “اؤلومله سونوجلانان یول قضالاریندا اتومبیل کئیفيتی‌نین پایینی” وورغولادی و قضادان اؤنجه و سونرا خسارتلرین میقدارینا ائتکی یارادا بیله‌جک معیارلاردان بیری‌نین “اتومبیل تهلوکه‌‌‌سیزلیگی” اولدوغونو سؤیله‌دی.
او، اتومبیل صنایع‌سی‌نین کئیفيتی‌نین یوکسلدیلمه‌سی ایله باغلی تنظیمله‌مه سیاستی‌نین باشلانماسیندان تخمیناً اوتوز ایل کئچمه‌سینه باخمایاراق، ایران اورتیمی اولان اتومبیللری “اینسانلارین اؤلومونون اساس سببلریندن بیری” آدلاندیریب.
