مدنی فعال صالح ملاعباسی ۳ آیلیق حبس جزاسینا محکوم ائدیلیب
دوغو آذربایجان ایالتی‌نین تئمییز محکمه‌‌سی قادین، حیات، آزادلیق اعتراضلاری ایله عینی واختدا حبس ائدیلن اهرده یاشایان مدنی فعال “صالح ملاعباسی”نی ۹۱ گونلوک حبس جزاسینا محکوم ائدیب.
ایران‌وایرین الده ائتدیگی بیلگیلره گؤره دوغو آذربایجان تئمییز محکمه‌‌سی‌نین ایکینجی شؤبه‌سی، ۱۷ مهر ۱۴۰۲-ده صالح ملاعباسی حاقیندا ایلکین محکمه‌‌ده چیخاریلان حؤکمو تصدیقله‌ییب. بو ایلین تیر آییندا “امیر خدیوی‌نین” باشچیلیق ائتدیگی اهر شهر جزا محکمه‌‌سی‌نین ۱۰۱ سایلی شؤبه‌سی بو تورک مدنی فعالی توپلومسال شعورو پوزماق مقصدی ایله یالان بیلگیلر یایماق اتهامی ایله ۹۱ گونلوک حبس جزاسینا محکوم ائدیب.
کئچمیش سیاسی محبوس و مدنی فعال صالح ملاعباسی اهرلی‌دیر. او، ۱۴۰۱-جی ایل مهر آیینین ۷-ده بوتون ایراندا حؤکومت قارشیتی اعتراضلارین داوام ائتدیگی بیر واختدا حبس ائدیلمیش و تبریز اطلاعات ایداره‌سی‌نین تجرید‌خاناسینا کؤچورولموشدور. بو تجرید‌خانادا حبسده ساخلانما و قرارسیزلیغا اعتراض اولاراق آجلیق آکسییاسی کئچیریب و نهایت ۱۸ آباندا محکمه‌‌‌یه قدر مووقتی اولاراق گیروو قارشیلیغیندا سربست بوراخیلیب. صالح ملاعباسی ۱۳۹۴-جو ایلده اعتراض آکسییالاریندا ایشتیراک ائتدیگینه گؤره حبس ائدیلیب و ۱۰ آی مدتینه حبس ائدیلیب.
