اسماعیل احمدی ورزقان عومومی و اینقیلاب ساوجیلیغینا چاغیریلیب
تورک مدنی فعال اسماعیل احمدی بکرآباد ۸ مهر ۱۴۰۲-ده محکمه‌نین الکترون سیستمی واسطه‌‌‌سیله آلدیغی بیلدیریشه اساساً ۵ گون ایچینده ورزقان عومومی و اینقیلاب ساوجیلیغیندا اونا قارشی ایره‌لی سورولن اتهاملاری ساوونمالیدیر.
ورزقان عومومی و اینقیلاب ساوجیلیغی‌نین بیرینجی شؤبه‌سی‌نین وئردیگی بیلدیریشده بو مدنی فعالین اتهاملاری “ایسلامی موقدسلیکلری تحقیر ائتمک، اینسانلاری داخیلی/خااریجی گوونلیگه قارشی جینایتلر تؤرتمه‌یه تحریک ائتمک، دوشمن شبکه‌لری ایله ایلیشگی و یالان یایماق و ایران ایسلام جمهورییتینه قارشی تبلیغات” قئید اولونور.
اسماعیل احمدی بکرآباد ۲ شهریور ۱۴۰۲-ده اهر شهری‌نین مرکزی زیندانیندان ۴۰۰ میلیون تومن گیروو ایله سربست قالمیشدی.
اؤنجه‌لر سونگون میس معدنی ایشچیلری‌نین دورومونا اعتراض ائتدیگی اوچون حبس ائدیلن جناب احمدی یاخینلاری‌نین بیلدیردیگینه گؤره، ۳۰ مرداد ۱۴۰۲-ده ورزقاندا گوونلیک گوجلری طرفیندن حبس ائدیلمیشدی.
