ایراندا اینتیهار سؤزونون آختاریشینی ایکی‌قات آرتیب
تهراندا یاییملانان اعتماد قزئتی ۱۳۹۹-جو ایلدن بری ایرانین اینتیهار ایستاتیستیکاسی یایمادیغینی وورغولایان بیر یازیدا ۱۴۰۲-جی ایلین یازیندا گوگل آختاریش سیستمینده “اینتیهار” سؤزو ایله باغلی آختاریشلارین ایکی قات آرتدیغینی آچیقلاییب.
اعتماد، ۱۹ شهریور بازار گونو یازیب کی، گوگل‌ده اینتیهار سؤزو ایله باغلی آختاریشلارین سایی محض اؤلکه‌ده‌کی ایغتیشاشلارین ظاهری گؤرونوشو آز اولاندا، یعنی ۱۴۰۲-جی ایلین فروردین آییندا آرتیب.
بو راپورا گؤره، ۱۳۹۹-جو ایله قدر قئیده آلینان ایستاتیستیک وئریلر گؤستریر کی، ۱۳۹۶-جی ایلین دی آییندان و ۱۳۹۸-جی ایلین آبانیندا کئچیریلن اعتراض آکسییالاری زامانی اینتیهار حاللاری بو اعتراضلاردان اؤنجه‌کی و سونراکی دؤورلرله موقایسه‌‌ده آشاغی اولوب.
اعتماد داها سونرا بو دالغالانمانین اعتراضلار زامانی اومیدین آرتماسی و یاتیریلدیقدان سونرا “مأیوسلوق” اولماسی و بو اعتراض دالغاسی‌نین طلبلری‌نین یئرینه یئتیریلمه‌مه‌سی ایله باغلی اولدوغو قناعتینه گلیب.
بو راپورا گؤره، ۱۴۰۱ شهریور آییندا اخلاق پولیسی نظارتی آلتیندا اؤلدورولن ۲۲ یاشلی قیز مهسا امینی‌نین اؤلومونه قارشی حؤکومته قارشی اعتراضلارلا باغلی بو دالغالانما، باشقا اعتراض دالغالاریندان داها چوخ اولوب.
بو راپوردا آیریجا بیلدیریلیر کی، اینتیهار ایران توپلومونون بوتون طبقه‌‌‌لرینی احاطه ائدن سوسیال حادثه اولسا دا، ان یوکسک درجه‌‌‌ده محرومیتله اوزلشن آشاغی طبقه‌‌‌لر و ایالتلر اینتیهار سؤزو و اینتیهار ایستاتیستیکاسی اوچون ان چوخ آختاریشلارا مالیکدیر.
اعتماد داها سونرا ایلام ایالتی‌نین بیرینجی، کهگیلویه‌و‌بویراحمد و همدانین ایالتلرینی ایسه سونراکی ایالتلر کیمی کاراکتریزه ائده‌رک یازیب کی، تهران “اینتیهار” سؤزونون آختاریشلارینا گؤره ۲۴-جو ایالتدیر.
اعتمادین راپوروندا ” کیومرث پوراحمد”، یؤنتیجی، ” زهره فکورصبور”، اوینچو، “آزاده نامداری”، آپاریجی و “شیده لالمی” ژورنالیستین اینتیهاریندان دا بحث ائدیلیر.
اعتماد قزئتی ۳۰ مرداد گونو باشقا بیر خبرده اینتیهار مسئله‌‌سینی موذاکیره ائده‌رک یازیب کی، اورتالاما هر ۱۰۰ مین ایرانلیدان ۱۲۵ نفری اینتیهار ائدیر.
اعتماد رسمی ایستاتیستیکایا ایستناداً یازیب کی، ایراندا سون اون ایلده اینتیهار حاللاری یوزده ۴۰-دان چوخ آرتیب و ایلده تخمیناً ۳۵۰۰ حادثه‌‌‌دن ۵ میدن چوخ حادثه‌‌‌یه یوکسه‌لیب.
بو راپوردا بیلدیریلیردی کی، ایستاتیستیک بیلگیلره اساساً، ایراندا هر گون ۱۳-دن چوخ اینسان اینتیهار ائدیر و اینتیهارلارین ان چوخو ۱۵-۳۵ یاش آراسی اینسانلار آراسیندا باش وئریر.
اگر سیز و یا یاخینلارینیز اینتیهار ائتمک باره‌ده دوشونورسونوزسه، ایراندا ۱۲۳ نؤمره‌سینه یعنی سوسیال تعجیلی یاردیما، ۱۱۵ نؤمره‌سی یعنی شهر تعجیلی یاردیما و یا ۱۴۸۰ نؤمره‌لی دانیشمان سسینه و یا تهرانداکی تعجیلی پسیکولوژیک خیدمت وئرن ۴۴۵۰۸۲۰۰ نؤمره‌سینه، افقانیستاندا ۱۱۹، بؤیوک بریتانییادا سماریتن خئیریه‌سی‌نین ۱۱۶۱۲۳ نؤمرسینه و آمریکا و کانادادا ۹۱۱ نؤمره‌سینه زنگ ائدین.
