ایسلام جمهورییتی تلویزیونو: ۱۳ ایالتده چؤرک باهالاشیب
ایسلام جمهورییتی تلویزیونو بیر پروقرامدا چؤرگین باهالاشماسی‌نین کنارلارینا توخونوب و پروقرامین آپاریجیسی ۱۳ ایالتده چؤرگین قیمتی‌نین آرتدیغینی آچیقلاییب.
بو وئریلیشده آپاریجی بعضی ایالتلرده ديیشیکلیکلر ائدیلدیگینی و یئتکیلیلرین دئدیگینه گؤره، بونون چؤرک خانالارین مادی دورومونو یاخشیلاشدیرماق، اؤزباشینا قیمتلرین آرتیشی‌نین قارشیسینی آلماق مقصدی داشیدیغینی وورغولاییب.
اؤتن هفته و آیلاردا ایرانین چئشیدلی ایالتلرینده چؤرگین قیمتی‌نین آرتماسی هر دفعه مئدیایا چاتاندا دؤولت یئتکیلیلری طرفیندن تصدیق و تکذیب پروبلئمی ایله اوزلشن خبرلردن بیری اولوب.
بوندان اؤنجه حؤکومت یئتکیلیلری چؤرک و اون یارانه‌لرین عاغیللی پلانی‌نین ایجراسی زامانی چؤرگین قیمتی‌نین قالخماسی احتیمالینی اینکار ائده‌رک بونو حؤکومتین قیرمیزی خطّی کیمی اعلان ائتمیشدیلر.
بو ایل تیر آیی‌نین اورتالاریندا اقتصاديات ناظری‌نین موشاویری، چؤرک و اون یارانه‌سی‌نین عاغیللی پلانی‌نین ایجراچیسی محمد جلال چؤرگین قیمتی‌نین بللی ائدیلمه‌سی‌نین ایالت یئتکیلیلرینه وئریله‌جه‌یینی، سونرا ایسه او، چؤرگین قیمتلری‌نین بللی اولونماسینی والیلیکلرینده اولان اون و چؤرگین ایل قرارگاهی اوزرینه گؤتوردو.
ایندییه‌دک مرکزی، رضوی خوراسان، گونئی خوراسان، قزوین و فارس ایالتلرینده چؤرگین قیمتی‌نین رسمی شکیلده آرتیریلماسی خبری آچیقلانیب.
