اصفهان حبس‌خاناسینا آتش آچیلماسی؛ آتش آچان پولیس طرفیندن اؤلدورولوب
ایران خبر آژانسلاری‌نین وئردیگی بیلگیلره گؤره، دونن گئجه ساعتلاریندا بلیرسیز شخص و یا شخصلر اصفهان مرکزی حبس‌خاناسی‌نین آنا قاپیسینا ماشینلا آتش آچاراق، اورادان قاچیبلار.
اصفهان ایالتی‌نین پولیس کوماندیری بو حادثه‌‌‌دن بیر نئچه ساعت سونرا هوجوم ائدنلرین آتیشمادا وینچستر و کلاشینکف سلاحلاریندان ایستیفاده ائتدیگینی آچیقلاییب و موتهیملرین باشقا شهرلره قاچما احتیمالی ایله علاقه دار بو مسئله اؤزل اولاراق بو کوماندانلیغین ضابیطلری‌نین گونده‌لیگینه آلینیب.
بوندان سونرا دلیجان شهری‌نین پولیس کوماندیری جمالی سالدیرقانین اؤلومونو آچیقلاییب و آرتیریب: پژو پارس مارکالی اتومبیل دلیجان شهری‌نین محدوده‌سینه گیردیکدن سونرا پولیس امکداشلاری‌نین دور امرینه اویمادان یوکسک سرعتله قاچیب. کئچید منطقه‌‌‌سیندن قاچان سوروجو پولیس قوه‌لرینه آتش آچماغا باشلاییب و پولیس امکداشلاری دلیجانین ایمام کوچه‌سینده آتش آچاراق ماشینی ساخلاییبلار.
جمالی دئییب: سلاحلی سالدیرقان خسته‌خانایا چاتدیریلماسینا و حکیملرین چابالارینا باخمایاراق دونیاسینی ديیشیب. تقصیرلندیریلن شخصین اتومبیلیندن بیر عدد کلاشینکف و بیر عدد وینچستر سلاحی ایله ۷۱ عدد مرمی‌نین آشکار ائدیلدیگی نظره آلیناراق، بونونلا باغلی آراشدیرمالار داوام ائتدیریلیر و داها سونرا بیلگی وئریله‌جک.
اؤتن گئجه اصفهان حبس‌خاناسیندا باش وئرن آتیشمانین سببی ایله باغلی هله ده خبر یوخدور.
