حسین امانی تبریز حبس‌خاناسیندان یئنیدن اطلاعات ایداره‌سینه کؤچورولوب
تورک مدنی فعال حسین امانی دونن گونورتادان سونرا عائله‌‌‌سی ایله تلفون دانیشیغیندا تبریز اطلاعات ایداره‌سینه کؤچورولدویونو بیلدیریب.
بیر نئچه گون اؤنجه سورغوسو سورجی باشا چاتدیقدان سونرا تبریز مرکزی حبس‌خاناسینا کؤچورولن بو مدنی فعال گوونلیک امکداشلاری‌نین تضییقی ایله یئنیدن اطلاعات ناظرلیگینه تحویل وئریلیب.
حسین امانی، نادارلی کندیندن (نظرلو) و تانینمیش فعاللاردان بیریدیر و تبریزین پیام نور بیلیم‌یوردوندا سیاست بیلیمی بؤلومونو بیتیریب.
بو مدنی فعالین قارداشی آراز امانی ده ۳۱ اردیبهشت گونو ساخلانیلیب.
داود شیری، جواد احمدزاده و علیرضا صبری ده ۲۸ اردیبهشت گونو ساخلانانلارین آراسیندایدیلار.
حبس اولونانلارین بعضی یاخینلاری و آذربایجان مدنی حرکاتی‌نین فعاللاری گوونلیک قوروملاری‌نین اؤتن ایللرده‌کی داورانیشینی نظر سالدیقدا، بو شخصلرین حبسی‌نین ۸۵-جی ایل اعتراضلاری‌نین ایلدؤنومو ایله باغلی اولدوغونو احتیمال ائدیرلر.
