تبریز طب علملری بیلیم‌یوردونون ۹ اؤیرنجیسی ائیتیم آلماقدان منع ائدیلیبلر
تبریز طب علملری بیلیم‌یوردونون ۹ اؤیرنجیسی، بیلیم‌یوردو اینضیباط کمیسیونونون وئردیگی قرارا گؤره، ایکی دؤنم ائیتیم آلماقدان منع ائدیلیبلر.
بو قرارین چیخاریلماسی قیز اوخوللاریندا اؤیرنجیلرین کوتلوی زهرلنمه‌لرینه اعتراض ائتمه‌لری سبب اولوب.
بیلیم‌یردونون اینضیباط کمیسیونونون وئردیگی قراردا ائیتیمدن محروم ائدیلن طلبه‌‌‌لر “ایغتیشاش و قاریشیقلیق یاراتماق”دا اتهام اولونوبلار.
بوندان بیر مدت اؤنجه ایسه تبریز بیلیم‌یوردونون ۴۰ اؤیرنجیسینه مئساژ گؤندریلیب و اونلاردان اینضیباط کمیسیونونا گئتمه‌لری طلب ائدیلیب.
قئید ائدک کی، ۲۰۲۲-جی ایلین شهریور آییندا ایراندا باشلایان اعتراض آکسییالاریندان سونرا مدنی فعالیت گؤسترن و اؤیرنجیلرین حبسینه اعتراض ائدن اونلارلا اوستاد ایشدن چیخاریلیب.
تبریز طب علملری بیلیم‌یوردو سون آلتی آیدا و سون اعتراضلاردان سونرا آذربایجاندا اؤیرنجی حرکاتی‌نین اعتراض مرکزلریندن بیری اولوب. بو مدت ایچینده بو بیلیم‌یوردونون بیر نئچه اؤیرنجیسی گوونلیک گوجلری طرفیندن چاغیریلاراق حبس ائدیلیب.
