بنجامین بریر و برنارد فیلان ایسلام جمهورییتی حبس‌خاناسیندان سربست بوراخیلیبلار
فرانسا جمهورباشقانی امانوئل ماکرون اؤز توییتر صفحه‌‌‌سینده مشهدده حبسده اولان فرانسا وطنداشی بنجامین بریر و ایرلاندییا-فرانسا وطنداشی برنارد فیلانین سربست بوراخیلماسینی اونایلاییب.
جوما گونو، ۲۲ اسفندده بو ایکی وطنداشین سربست بوراخیلماسینی آلقیشلایارکن ماکرون اونلارین آزاد ائدیلمه‌سینده یاردیم گؤسترن هر کسه تشکّور ائدیب و ایراندا حبسده اولان باشقا وطنداشلاری‌نین گئری قایتاریلماسی اوچون چابالارینا داوام ائتدیره‌جه‌یینه سؤز وئریب.
فرانسا خاریجی ایشلر ناظرلیگی بنجامین بریر و برنارد فیلانین سربست بوراخیلماسی خبرینی اونایلاییب و اونلارین مشهد حبس‌خاناسیندان سربست بوراخیلاراق فرانسایا یوللاندیغینی بیلدیریب.
فرانسانین خاریجی ایشلر ناظری کاترین کولونا، بیلدیریب کی، فرانسا حؤکومتی ایراندا حبسده اولان باشقا وطنداشلاری‌نین سربست بوراخیلماسی اوچون چابالارینی داوام ائتدیره‌جک.
بو گون سحر ایرنا خبر آژانسی فرانسا-ایرلاندییا وطنداشی برنارد فیلانین “اینسانی نه‌دنلره” گؤره سربست بوراخیلدیغینی آچیقلاییب.
توریزم ساحه‌سینده آکتیو فعالیت گؤسترن ایکیلی ایرلاندییا-فرانسا وطنداشی اولان ۶۴ یاشلی برنارد فیلان اؤتن ایل مهر آیینین باشیندا ایراندا عومومی اعتراضلارین قیزغین واختیندا مشهدده حبس ائدیلیب.
بنجامین بریر ده ۱۳۹۹-جو ایلین اردیبهشت آییندا جاسوسلوق اتهامی ایله حبس ائدیلیب و سککیز ایل مدتینه حبسه محکوم ائدیلیب.
