بیلدیرگه : دونیا آنا دیلی گونو، ایراندا اولان” دیل آیری‌سئچگیلی‌گه تپکیلر” دونیا ایل سایارین‌دا فئورالین ۲۱( اسفندین۲)
دونیا ایل سایارین‌دا فئورالین ۲۱( اسفندین۲) بین الخالق دیل و کولتورون عزیرلمه و چئشیتلینی قوروماق اوچون ۲۰۰۰م ایلدن بری، بیرلشمیش میللتلرین ائیتیم، علمی و کولتورل تشکیلاتی “یونسکو”، طرفیندن ” دونیا آنا دیلی گونو” آدلانیبدیر. او زاماندان میللیتلرین و اتنیکی آزلیقلارین علیهنه اولان ” دیل و کولتور آیری سئچگیلیک” آدلانان قونویا موختلیف تپکیلر وئریلیبدیر. بیرلشمیش میللتلرین عمومی مجمعی‌نین مدنی و سیاسی آندلاشمانین ۲۷-اینجی ماده‌سی و ایرانین آنا یاسا‌سی‌نین ۱۵-اینجی بندین‌ده قئید اولماغا رغما، ایراندا آنا دیلینده ائیتیم‌دن یانا بیر چوخ فعال‌لار، میللی تهلوکه علیهینه اتهاملا سوچلانیرلار و آنا دیلینده ائیتیم حاققیندان دفاع اوچون چوخلو ضررلر چکیرلر. کئچن ایل ایرانین یازارلار تشکیلاتی‌نین، دونیا آنا دیلی گونو اوچون یازیلان بیانیه‌ده اوخویوروق: ” ایران چئشیتلی دیللی اولان بیر اولکه‌دیر. بو دیل‌لر کئچمیشدن ایندیه‌دک فارس دیلیله بیرگه، جانلی شکیلده یاشایبلار. خالقین هر بیر گوروپون دیلی بو گون یاشاییرسا ، بو او آنلامدادی کی، یوز‌ایل‌لرین حادثه‌لر و بوروقلاریندان سلامتله کئچیبدیر، اونون اوچون بیزیم بورجوموزدور اجدادیمیر سایاق اونو شوونیست حاکملرین هجوموندان قورویاق. بو گون”تجزیه‌فوبیاسی” باعث اولوب اولکه‌ده نئچه‌دیللی‌لیک قونوسونا باخیشلار، سیاسی و آیاقلاماق گوزویله اولسون. بو حوزه‌ده مدنی فعال‌لارین توتولوب تاپدالانماسی بو باخیشین نتیجه‌سیدیر. دیله سلطه واوستدن آشاغا باخیشلار عموم بشرین کولتورونه قیریجی ضربه‌دیر”.
تحصیلی امنییتی ائتمک سورونو، همچنین آنا دیلینده تحصیل آلماق ایستمک حاقی، کئچن یوز ایلده، بوتونلوک رژیملرین، کئچمیش و ایندیکی رژیم، طرفیندن ائله سورونلو اولوب کی، مدنی و کولتورل فعال‌لار بو ساحه‌ده، سلامتلیق و جانلاریلا بو ایلکین حاقی، توتوقلانما، ایشکنجه و اوزون مودتلی حبس‌لرله اوده‌یبلر و حالا بئله اودییرلر. بو تاپلانمیش و فیشاردا اولان اینسانلاردان بیری مهندس علیرضا فرشی‌دیر. او دورد ایل ایکی‌آی زیندان چکندن سونرا، کئچن گونلرده آزادلیقلا بوراخیلیب. تهران انقلاب محکمه‌سی” علیرضا فرشی دیزج یکان” سیاسی زیندانینی، توپلام ۴ ایل ایکی آی زیندانا محکوم ائتمیشدیر. علیرضا فرشی، ایراندا یاشایان میللیتلرین دیل حاقلارینی مودافعه ائدن فعال‌لارداندیر. آذربایجانلی بو مدنی فعال، دفعه‌لر بو فعالیتلر اوچون، او جومله” تورک دیلینده کتابخانا دوزلتمک، آنا دیلینده تحصیل ایستگی کمپینلر دوزلتمک، دونیا آنا دیلی گونونو عزیرلمک، اوچون توتولوب ساخلانیلیب. بوندان اونجه ۱۳۹۸-جی ایل دی آییندا، تهرانین تجدید نظر دادگاهی‌نین ۵۴-جی شوعبه‌سی، علیرضا فرشی، اکبر آزاد، حمید منافی و بهنام شیخی‌نی، ۱۳۹۲-جی ایلده” دونیا آنا دیلی گونو” مراسیمینده اشتراک ائتمک اوچون، بهارستان شهرینده ۸- ایل حبس و ۸- ایل تبعیده محکوم ائتمیشدیر.
بو ایل بیر شرایطده” دونیا آنا دیلی گونو” نو عزیزلمه‌گه حاضیرلاشیریق کی اولکه‌میز، “قادین، یاشام، آزادلیق” انقلابی‌لا حساس آنلاری یاشاییر. اپوزیسیون‌دا اولان شونیست و دیکتاتور لار، وار گوجویله بو میللتدن چالیب آپاران مالی قودرتله، دیشله- دیرناقلا اوزلرینی ایرانین تکجه اپوزسیون نماینده‌لری کیمی گورستمک ایستیرلر. اونلار چالیشرلار، مرکزلاشدیریلممیش بیر سیستم یاراتماغین قاباغینی آلسینلار.
بو سیستم مشروطه دئورانین آنا یاساسیندا یازیلان ” انجمنهای ایالتی و ولایتی” قانونو کیمی، ایرانین بوتون بولگه‌لرینین میللی، کولتورل، سوسیال و اقتصادی حاقلارینی، محلی ایداره‌چیلرین الیله قورویوب الده ائتسین. اونلار بو ایشلریله مئدیا قودرتلریله، دونیا خالقی‌نین گوزونه تورپاق سپیرلر. کئچمیش یئنیلمیش رژیمین تاج تخت وارثی، بو سوالین جوابیندا کی، آنا دیلینده تحصیل آلماق ندیر؟ آشکارا دئییر: بو طلبین ندنی‌نی آنلامیر و آنا دیلینده تحصیلین واجیب اولماغی اونا آیدین دئییل.
بئله بیر تاریخی حساس دونم‌ده، گرک بوتون اوشاق و بشر حاقلاری مدافعه‌چیلری و اولکه‌نین معنوی میراثینی قورویانلارین بوینونا دوشور، قول- قولا وئریب سکولار دموکرات فدرال سیستمینی یاراتماغا بیرلشیب، شونیسم قوه‌لری‌نین قارا بولوتلارینی سرمه‌گه ایزین وئرمسینلر.
بلگه‌سل منبع‌لری ایراندا ۷۶- جانلی دیلین اولدوغونا ایشاره ائدیرلر. بو آرادا ایراندا ۲۰- یه یاخین دیل ائولوب، مهو اولماق اوزرینده‌دیرلر.
دونیا آنا دیلی موبارک اولسون
غیر متمرکز فدرال دموکرات سیستمی یاراتماغا دوغرو آددیملایاق
چوخ میللیتلی ایراندا، تاپدالانمیش دیل‌لرین رسمی‌لشدیرمه‌گه دوغرو ایره‌لی
آذربایجانین دموکرات پارتیسی
۲۰ فئورال۲۰۲۳
۲ اسفند ۱۴۰۱
