مولوی عبدالحمید زاهیدانین قانلی جوما گونو یارالیلاری ایله گؤروشوب
زاهیدانین سونی جوما ایمامی مولوی عبدالحمید مکی مسجیدینده زاهیدانین قانلی جوما گونونده یارالانان بیر قروپ شخصله گؤروشوب.
سیستان و بلوچییستان خبرلرینی یایان حالوش تلگرام کانالی بو گؤروش خبرینی تصدیقله‌یرکن یازیب: ۸ مهر قانلی جوما گونو یارالانانلاردان بیر نئچه‌سی زاهیدانین مکی مسجیدینده مولوی عبدالحمید ایله گؤروشوب و قتل عامین سببکارلاری‌نین موحاکیمه اولونماسی و جزالاندیریلماسینی وورغولاییب.
داها سونرا مولوی عبدالحمیدین اوفیسی ده اؤز تلگرام کانالیندا قانلی جوما گونو یارالانانلارین زاهیدانین سونی جوما ایمامی ایله گؤروشونون شکیللرینی یاییب و آچیقلاییب: زاهیدان اعتراضی قوربانلاری‌نین مولوی عبدالحمید ایله گؤروشونده، یارالیلارین حوقوقلاری‌نین تعمین اولوندوغونا قدر داوانین داوام ائتدیریلمه‌سی و گوناهسیز اینسانلارین اؤلدورولمه‌سی‌نین سببکارلاری‌نین جزالاندیریلماسی وورغولانیب.
۸ مهرده زاهیدان شهرینده چوخلو سایدا اعتراضچی‌نین گوونلیک گوجلری‌نین آتشی ایله اعتراضلاری یاتیریلیب. زاهیدانین قانلی جوما گونو کیمی تانینان بو گون اونلارلا اعتراضچی اؤلوب و یارالانیب، اونلارین آراسیندا چوخلو سایدا قادین و اوشاق دا وار. چابهاردا بیر پولیس سرهنگی‌نین بیر بلوج قیزا تجاووز ائتمه‌سینه اعتراض علامتی اولاراق زاهیدان اهالیسی‌نین چوخو کوچه‌یه چیخیب و گوونلیک گوجلری‌نین بیرباشا آتشی سونوجوندا یوزه یاخین اینسان حیاتینی ایتیریب.
بو آجیماسیز باسقیلاردان سونرا مولوی عبدالحمید زاهیداندا اینسانلارین اؤلدورولمه‌سینده اساس یئتکیلی اولاراق علی خامنه‌ای‌نی گؤستریب و گوجلو گوونلیگ تضییقلرینه باخمایاراق، اعتراض خوطبه‌لرینی داوام ائتدیریر.
