حسین خدایی 20 گونلوک حبسدن سونرا عائله سی ایله ایرتیباطا کئچه بیلیب
آذربایجانلی مدنی فعال حسین خدایی ۲۰ گونلوک حبسدن سونرا ایکی گون اؤنجه عائله‌‌‌سینه زنگ ائده بیلیب.
زنگ واختی جناب خدایی حبسی‌نین سببلری و اونا قارشی ایره‌لی سورولن اتهاملار باره‌ده عائله‌‌‌یه بیلگی وئره بیلمه‌ییب.
حسین خدایی ۱۶ آذرده ایش یئرینده گوونلیک گوجلری طرفیندن حبس ائدیلیب و گوونلیک گوجلری اونون ائوینده ده آختاریش آپاریب و بعضی شخصی اشیالارینی موصادیره ائدیب.
۸ ایللیک ایران-عراق ساواشی‌نین بو یوزده ۴۰ جانبازی حبس ائدیلدیکدن سونرا گوونلیک گوجلری اونون ائوینده آختاریش آپاراراق شخصی اشیالاری‌نین بیر قیسمینی موصادیره ائدیب.
جناب خدایی داها اؤنجه‌ده گوونلیک اورقانلاری طرفیندن چاغیریلاراق حبس ائدیلیب.
سون اعتراضلاردا اینترنتین حؤکومت طرفیندن کسیلمه‌سی و توتولانلارین و اؤلنلرین عائله‌لرینه حؤکومتین باسقیسی، توتولان و حیاتینی ایتیرنلرین دقیق سایی‌نین بللی ائدیلمه‌سینی چتین‌لشدیریب.
#عومومی_اعتراضلار
