ایسلام جمهوریتی تورکیه‌ده‌کی مدنی فعاللاری تهدید ائدیب
بی‌بی‌سی فارسجا خبرینده تصدیقله‌ییب کی، ایسلام جمهورییتی ایراندا عومومی اعتراضلاردان سونرا تورکیه‌ده یاشایان بعضی ایرانلی مدنی فعاللاری اؤلومله تهدید ائدیب.
بو مدنی فعاللار ایراندا ارشاد دئوریه‌سی (اخلاق پولیسی) نظارتینده اولان مهسا امینی‌نین اؤلوموندن سونرا باشلایان عومومی اعتراضلاری دستکله‌ییرلر.
بو راپورا گؤره، بو مدنی فعاللار سون گونلر تهدید ایچریکلی متن و سسلی مئساژلار آلیبلار و خبردارلیق ائدیلیبلر کی، اونلار ایرانداکی اعتراضلارا دستکلرینی دایاندیرمازلارسا و تورکیه‌ده ایسلام جمهورییتینه قارشی اعتراض آکسییالاری کئچیریرسه‌لر، “جدی سونوجلارلا” قارشی-قارشییا قالاجاقلار.
آیریجا، بو مدنی فعاللاردان بعضیلری سون بیر نئچه گونده ایراندا عائله‌‌‌لرینه تضییقلرین آرتدیغینی بیلدیریب و عائله‌‌‌لردن اؤولادلارینی ایرانا قاییتماغا تشویق ائتمیی ایسته‌ییبلر. بو آرادا، گوونلیک سببییله آدینین آچیقلانماسینی ایسته‌مه‌ین بو فعاللاردان بعضیلری گوونلیک پروبلئملری، جزا و حبس اولونما احتیمالی سببیندن ایرانی ترک ائتمک مجبوریتینده قالیبلار.
#عومومی_اعتراضلار
