محمدرضا هیئت:میلّی حرکتین رفورما احتیاجی وار
برگرفته از حساب توییتر دکتر محمدرضا هیئت
میلّی حرکتین یارانما تاریخی بللی دئییل. آنجاق بو حرکتین 1990-لاردان، یعنی ایکینجی آذربایجان جمهوریتی‌نین قورولوشوندان سونرا آکتیولشدیگینی سؤیله‌سک، یانلیش اولماز. باشدا 90-لی ایللرین گنج نسلی‌نین تورک سیاسی و کولتورل حیاتدا آکتیولشمه‌سی و دگیشیک آدلار آلتیندا تشکیلاتلانماسی ایله اؤزونو گؤسترمگه باشلایان بو حرکت، هر کسیمدن و هر گؤروشدن انسانی ایچینه آلان بیر حرکتدیر. حرکته منسوب شخصلرین اورتاق یانی ایسه، آذربایجان تورک کیملیگینه اولان باغلیلیقلاری و اونو قوروماق و گلیشدیرمک اوچون گؤستردیکلری چابارلاردی.
🔹میلّی حرکتین گئچن 30 ایلده‌کی فعالیتلری، گؤردویو ایشلر و بوراخدیغی ائتکیلر دقته‌دگر درجه‌ده اؤنملی‌دیر. حتی بوگون ده داوام ائدن سون اولایلارا قدر، گونئی آذربایجانین ان اؤنملی و ان ائتکیلی سیاسی آخیمی اولاراق بیلینیردی. آنجاق آنیدن گلیشن و گئتدیکجه بؤیوین سون اولایلار، گونئی آذربایجانین سیاسی حرکتلیلیگینی، میلّی حرکتین تک‌الیندن (انحصاریندان) چیخارمیش، میلّی حرکتی نیسبی اولاراق حاشیه‌یه بوراخماغا زورلامیش، بیر آنلامدا میلّی حرکتی سوللایاراق اونون اؤنونه گئچمیشدیر.
🔹گرچک بو کی، میلّی حرکت منسوبلاری بوگونه قدر بوتون فعالیتلرینی میلّی کیملیک مسئله‌سینه، تورک دیل و کولتورونون گلیشمه‌سینه، اؤلکه‌نین سیاسی یاپیسینا و چئوره مسئله‌سینه یوغونلاشدیریرکن، یئنی یئتیشن گنج نسلین گونلوک یاشامدا یاشادیغی سورونلاری اؤنمسه‌مه‌دی، گؤرمزدن گلدی، جیدییه آلمادی و یا اهمال ائتدی. میلّی حرکت منسوبلاری، ایلک گوندن اعتباراً میلّتی مخاطب آلماق یئرینه، بو حرکتین باشقا منسوبلارینی مخاطب آلاراق، اؤز سؤیلملرینی اثباتلاماق و یا گلیشدیرمکله اوغراشیرکن، گنجلرین هر گون یاشادیقلاری سیخینتیلاری گؤرمک و دینله‌مکدن، دولاییسی ایله اونون دردینی آنلاماق و اونا چیخیش یولو تاپماقدان اوزاق قالدیلار.
🔹بئله‌لیکله حرکت ایچیندن بعضیلری میلّی و سیاسی مسئله‌لری اؤن پلاندا توتوب، بوتون فعالیتینی اونا یوغونلاشدیرارکن، کیمیلری ده میلّی ایستکلردن و «میلیتچی‌لیک» آنلاییشیندان ال اوزه‌رک، ساده‌جه توپلومسال مسئله‌لرله اوغراشما یولونو منیمسه‌دیلر. بو دوروم، بیر یاندان میلّی حرکتین ضعیفله‌مه‌سینه، اؤته یاندان دا گنج نسلین اونودولماسینا، اهمال ائدیلمه‌سینه یول آچدی.
🔹بوگون میلّی حرکتین جیدی بیر رفورما احتیاجی وار. آرتیق حرکت منسوبلاری‌نین اساس مخاطبی بو حرکتین باشقا منسوبلاری اولمامالی‌دیر. گونوموزده اینترنت سرعتی‌نین دوشوکلویو، قیزلارین و اوغلانلارین بیر-بیریندن آیری مکتبلرده اگیتیم آلماسی، گنجلرین اگلنه‌بیله‌جک مکانلاردان محروم قالماسی، بیر گنجین قورخو و استرس یاشامادان سئوگیلیسی ایله ال-اله گزه‌بیلمه‌سی، باشقا اؤلکه‌لرین وطنداشلاری کیمی دونیا اؤلکه‌لرینه راحاتلیقلا گئدیب-گله‌‌بیلمه‌سی، سؤزونو چاتدیرماق اوچون بیر تریبونا صاحیب اولماسی کیمی تمل احتیاجلار دا، ان آز دیل و کیملیک مسئله‌سی قدر میلّی و حیاتی مسئله‌دیر. بونلاری بیر آرادا دگرلندیره‌بیلمه‌ین، چؤزوم آختارمایان، یئنی نسلی و نسیللری اؤزونه چکه‌بیلمه‌ین هر هانسی بیر حرکت، یوخلوغا محکومدور.
محمدرضا هیئت
