اعتراضلاردا حیاتینی ایتیرن سارینا اسماعیل زاده‌نین آناسی‌نین اینتیحار خبری بیلدیریلیب
سارینا اسماعیل‌زاده ۱۴۰۱-جی ایلده ایراندا ۳۰ شهریورده کئچیریلن عومومی اعتراضلار زامانی ایسلام جمهورییتی گوجلری طرفیندن باشیندا ديه‌نکله اؤلدورولن کرجین مهرشهریندن اولان ۱۶ یاشلی قیز ایدی.
توییتر قوللانیجیلاری‌نین سؤزلرینه گؤره، بو یئنی‌یئتمه‌نین آناسی سون بیر نئچه گونده قیزی‌نین اؤلومونه دؤزه بیلمه‌ییب و اینتیحار ائدیب.
دونن ایسلام جمهورییتی‌نین گوونلیک گوجلری طرفیندن حبس ائدیلن بختیاری صنعتچی محسن لک باجیسی مهناز لکین توتولماسیندان سونرا آنالاری‌نین بیر نئچه ساعت سونرا دونیاسینی ديیشدیگینی آچیقلاییب.
حؤکومته قارشی اعتراضلاردا حبس اولونان و اؤلدورولنلرین والیدئینلری‌نین اینتیحاری و اؤلومو ایراندا گؤرونمه‌میش حادثه دئییل.
۱۳۹۹-جو ایلین مهر آییندا ۹۸ آبان اعتراضچیلاریندان بیری اولان امیرحسین مرادی‌نین آتاسی ائوینده اینتیحار ائده‌رک حیاتینی ایتیردی.
بو سیاسی محبوسون آتاسی ایسلام جمهورییتی‌نین محکمه سیستمی اوغلونا اعدام حؤکمو چیخاردیقدان سونرا اینتیحار ائدیب. سونرادان بو حؤکم عالی محکمه طرفیندن لغو ائدیلیب.
#عومومی_اعتراضلار #سارینا_اسماعیل‌زاده
