حبیب ساسانیان :موغان قورولتایی نادرشاه ایله علی خامنهاینین اورتاقلیقلاری!…
دوْغۇنۇن ناپالئوْنۇ آدلانمؽش نادیر قۇلۇ بَی (نادر شاه افشار) لئقال (مشروعجاسؽنا)شاهلؽق مقامؽنا یئتمک اۆچۆن مۇغان دۇزۇنده آزربایجان خانلارؽنؽ توْپلایاراق، اۇنلارا پرده آرخاسؽ باسقؽلار لا، اؤز ایستهگینه چاتؽر.
اوْ، ایشین گئدیشاتؽندا اؤزۆنۆ ائله آپارؽر؛ سانکی کؤنۆلدن بۇنا قارشؽدؽ، آنجاق میللی گؤرَودن دوْلایؽ، بو آغؽر یۆکۆ داشؽماق زوْرۇندا قالؽب!
باخمایاراق کی، نادیرشاهؽن اؤزل حربی- سیاسی باجارؽقی اوْنا بو یوْلدا یئترینجه لئقال حاقق قازاندؽرمؽشدؽ. باشقا سؤزله، دئمک اوْلار کی، گئرچکدن اوْنا بۇ پای دۆشۆردۆ.
خمینینین آغؽ بارداغؽنؽ (جام زهر) ایچدیگیندن سوْنرا، اؤلکه تاریخینده «موغان قۇرۇلتایؽ» تکرارلانؽر؛ بئله کی، رهبرلیک اۆچۆن خبرگان مجلسینین توْپلانتؽسؽندا، علیاکبر هاشمی رفسنجانی واسطهسی ایله، سانکی علی خامنهاینی اؤزۆ ایستهمهدن اؤلکهرهبری سئچیرلر. چاغؽمؽزؽن تئکنوْلوْژیا نعمتیندن بارؽناراق بۇ اوْلایؽن گئرچک هابئله دوْغال گؤرۆنتۆسۆنۆ (انتخاب علی خامنه ای به رهبری ) باشلؽقلا، توْپلۇمسال توْرلاردان (اجتماعی شبکهلردن) ألده ائتمک، ائله ده چتین دگیل.
بو آرا، نادیر قۇلۇ افشارؽن (تاجلؽ پادشاه)، سیدعلی نین ایسه (عمامهلی شاه ) سئچیلدیکلرینین درین فرقلرینی اۇنۇتمامالؽیؽق.
نادیرقۇلۇ، چاغؽنؽن أن قوْرخماز ایگیدی، ائلهجه ده، باجارؽقلؽ اوْردۇ باشقانؽ اوْلماقلا یاناشؽ، سیاست آلانؽندا دا، اۇغۇرلۇ بیر لیدئر اوْلاراق، اؤزۆنۆگؤسترمیشدیر. زامان آخؽنؽ دا اوْنون تایسؽز حربی-سیاسی اۇغۇرلارؽندان دوْلایؽ، حاقلؽ اوْلدۇغۇنۇ سرگیلهدی.
علی خامنهاییه گلدیک ده، تام ترس بیر گؤرۆنتۆ (منظره-تصویر ) ایله اۆزلهشیریک.
علی خامنهاینین رهبرلیک مقامؽنا سئچیم آنؽندا، اؤزۆنۆ نازا قوْیاراق:« اگر من رهبر این مملکت انتخاب شوم، باید بر حال و روز این مملت خون گریست» چؽخؽشؽ، گئرچک دن ده ائله اوْلدۇغۇ، ایندی گؤز اؤنۆنده دیر.
دئمهلی آداملار، اؤزلرینی هامؽدان یاخجؽ تانؽیؽرلار. بۇنا باخمایاراق، مقام منصبین دادؽ، ائله بیر زاد دگیل کی، حتی دینی بیر عالیمی ده آلداتماسؽن. اوْ گئرچکدن ده، اؤلکه تاریخینده أن اۇغۇرسۇز لیدئرلردن دیر. ۱۳۸۸-جی ایل یاشؽل حرکاتؽ قاباردؽقدا، باجاررؽقسؽلیغؽندان دوْلایؽ: «جسم علیلی دارم…» دئییب، تۆلکۆ سایاق گؤزۆنۆن لؽلؽغؽنی تؤکۆب، بیر سؽرا قاراقۇلاق بسیجیلری کؤورلتمهسی، رهبرلیگه سئچیمینده دانؽشدؽغی آجؽ گئرچگین تصدیقلنمهسینه آیدؽن فاکتلاردان بیریسیدیر.
سیزجه، نییه بۇ اؤلکهده تاریخ آرد-آردا ترسینه تکرار اوْلۇر؟!
