صمد عمی گلمدی: ایفا رحمتلیک “توحید نوروزی”

باهارین او اوزون گونو نه اولدو؟!
یئنه باغچاداکی گول‌لر ده سولدو
اولدوزون گؤزلری یاش ایله دولدو
داها آراز اوستدن گمی گلمه‌دی!
آی اوشاق‌لار صمد عمی گلمه‌دی!

نامردین قاراسی نه ایتمز اولدو،
اوره‌ییم یاراسی نه بیتمز اولدو.
گئتدی آرخاداشیم قاییتماز اولدو
داها آراز اوستدن گمی گلمه‌دی!
آی اوشاق‌لار صمد عمی گلمه‌دی!

گلین گئدک دریالاری آختاراق
او قارا بالیغین نیشانین تاپاق
بلکه ائلیمیزین قصاصین آلاق
داها آراز اوستدن گمی گلمه‌دی!
آی اوشاق لار صمد عمی گلمه‌دی!

شعر: #سهراب_طاهیر
ایفا: رحمتلیک #توحید_نوروزی
بو گون صمد بهرنگی‌نین دوغوم گونودور…