سایین مهندس حسن راشدی نین سون دورومو «اکبر آزاد»
آذربایجانین تانینمیش ملی- مدنی فعالی سایین مهندس حسن راشدی نین سون دورومو «اکبر آزاد»
تخمینن ۱۷ گون اؤنجه تهران خییابانلارینین بیرینده موتورسیکلئت قضاسیندا سرت یارالانمیشدیر بوندان اؤنجه یازدیغیم خبرده، گلمیشدیر کی، سایین مهندس حسن راشدی تهران خییابانلارینین بیرینده موتورسیکلئت قضاسیندا سرت یارالانمیشدیر و اورژانس آمبولانسی واسطه سییله امام خمینی خسته خاناسینین اورژانس بؤلمه سینه آپاریلمیشدیر.
اورادا یاراسی بخیه لنیب پانسمان اولموشدور. آنجاق تأسف له معالجه زامانی بیر چوخ دقت سیزلیکلر اولموشدور؛ او جمله دن: -کوزاز واکسنی آشیلامامیشدیلار و سایین راشدی سونراسی باشقا بیر طبی مرکز باش ووراراق کوزاز واکسنی آشیلاتدیرمیشدیر.
-بخیه دن سونرا آنتی بیوتیک آمپولی تزریق اولمامیش و یالنیز بیر هفته لیک آنتی بیوتیک کپسولی درمان نسخه سینده یازیلمیشدیر.
-امام خمینی خسته خاناسینین اورژانس بؤلمه سیندن مرخص اولدوقدا، اولجه یارالارينين التیامی اوچون هیچ بیر درمان وئریلمه میشدیر و سونرادان قاییدیب اصرارلا درمان ایسته دیکده، یالنیز جزئی اولاراق بیر هفته لیک درمان یازمیشدیلار (آنتی بیوتیک و آغری تسکینله دیجیسی) حال بو کی، یارانین بخیه لرینی گؤتورمک اوچون ایکی هفته وقت تعیین ائتمیشدیلر.
– خسته خانادان مرخص اولدوغو زامان، یارانین صحیه و ساغلاملیق ایشلرینی قوروماق اوچون و یارانین نئجه یویولوب پانسمانینی دییشمک اوچون هیچ بیر تاپشیریق وئریلمه میشدیر و یارانین عفونتی نین قارشیسینی آلماق اوچون، ائشیکدن یویولماسییلا ایلگیلی هیچ بیر محلول (بئتادین، ساولون و…) وئریلمه میشدیر.
-و…. و بونلار کیمی سایر دقت سیزلیکلر سبب اولموشدور سایین مهندس راشدی نین موتورسیکلئت قضاسیندان آلدیغی یارا شدتله عفونت انتسین!
یعنی ۱۵ گوندن سونرا یارانین بخیه لرینین آچیلما زامانی گلدیکده، ائولرینه باخین باشقا بیر طبی مرکزه مراجعه ائتدیکده یاراسینین عفونی اولدوغونو اونا بیلدیریب؛ آنتی بیوتیک آمپولونو سئروم آراسی سایین راشدی یه تزریق ائدیب دئمیشدیلر:
-یارانین عفونتی نین آرتیقراق کنترولو اوچون، یارانی بخیه ائدن طبی مرکزه باش وورمالیسان و …. نهایت سایین راشدی کئچن پنجشنبه گونو، خورداد آیینین ۱۸ امام خمینی خسته خاناسینین اورژانس بؤلمه سینه مراجعه ائتمیشدیلر .
امام خمینی خسته خاناسینین اورژانس بؤلمه سینده معاینه دن سونرا دئمیشدیلر: عفونتین قارشیسنی آلماق اوچون ۳-۲ گون خسته خانادا یاتمالیسان آمما نه دنسه تخمینن ۶.۳۰ ساعاتدان سونرا(تخمینن ساعات گون اورتا ۱۲-دن آخشام اوستو ۳۰/۱۸ قدر) یالنیز سئروم آراسی آنتی بیوتیک تزریق ائدیب و درمان نسخه سینده یالنیز آنتی بیوتیک کپسولو يازيب ترخیص ائتميشلر!
یعنی معالجه نی دایاندیریب، دئمیشدیلر:
-بیز سنه بیر ایش گؤره بیلمه ریک و یالنیز سنی معالجه ائدن حکیم، سنین یاران باره ده نظر وئره بیلر. گئت او حکیم مراجعه ائت!
سایین راشدی بی دئمیشدیر:
-منی اورژانس آمبولانسی، بورایا گتیرمیشدیر. منی معالجه ائدن حکیم ده، سیزین امکداشینیز دیر و بو خسته خانانین اورژانس بؤلمه سینده چالیشان بیر حکیم اولموشدور.
امام خمینی خسته خاناسینین اورژانس بؤلمه سینین حکیملری دئمیشدیلر:
-بیز تانیمیریق و اونون مسئولیتینی بوینوموزا آلا بیلمه ریک.
و بئله لیکله ده یاراسی شدتله عفونت ائتمیش بیر خسته نی معالجه دنمحروم ائدیب، خسته خانادا پاتیرمامیشدیلار.
سایین راشدی بی، او حکیمن آدینی بیلمک ایسته میشدیر، اونون کیمی اولدوغونو و آدینین نه اولدوغونو دا دئمه میشدیر.
ماراقلیسی بورادا دیرکی، سایین راشدی خصوصی خسته خانالارا دا باش ووردوقدا، یاراسی عفونت ائتدیگینه گؤره معالجه ائتمه سینی قبول ائتمه میشدیلر.
