غربی آزربایجان‌دا اوزمان حکیم یئتمزلیگی وار
غربی آزربایجانین طب علملری بیلیم یوردونون درمان اوزره معاونی دئییب: ایالتده بعضی اوزمانلیق آلانلاریندا حکیم یئتمزلیگی ایله اوزلشیریک.
مسعودی ایسنایا وئردیگی موصاحیبه‌ده دئییب: بعضی ساحه‌‌‌لرده، مثلا، آنئستئزی (بیهوشی) بؤلومونده حکیم و اوزمان یئتمزلیگی ایله اوزلشیریک کی، بو دا میلی پروبلئمدیر و ایالتیمیزه اؤزل دوروم دئییل.
او بیلدیریب: آنئستئزی قبول ائتمک قابیلیتینه مالیک ۳۰۰ نفرلیک یئره یالنیز ۳۰ نفر باش ووروب و ایندی بو ساحه‌‌‌ده ۲۷۰ نفر بوش یئریمیز وار.
مسعودی شهرلرده ایشچی قوه‌سی و اوزمان حکیم چاتیشمازلیغی ایله باغلی بونلاری بیلدیریب: بعضی شهرلرده تک اوزمانلیق آلانی وار و بعضیلرینده اوزمان حکیم گتیرمک اوچون داواملیلیق پلانیندان ایستیفاده ائدیریک و حکیم مرخصی‌ده اولاندا یئرینه باشقا حکیمدن ایستیفاده ائدیریک.
غربی آزربایجانین طب علملری بیلیم یوردونون درمان اوزره معاونی نورمال واختدا طب باجیسی یئتمزلیگینین اولمادیغینی وورغولایاراق قئید ائدیب: تأسفلر اولسون کی، کرونا خسته‌لیگی‌نین باش وئرمه‌سی ایله بیز کادر یئتمزلیگی ایله اوزلشیریک. مثلا، حاضردا طالقانی خسته‌خاناسیندا کرونا خسته‌لیگی اولان و قرنطینه‌ده اولان ۴۵ طب باجیسی وار.
او، داوام ائتدی: ایالتده طب باجیسی کادرلاری یئتمزلیگی سببیندن ایشه آلینماق اوچون بیر سیرا ایجازه‌لر وئریلیب و یاخین واختلاردا یئنی کادرلارین ایشه آلینماسی گوندمده اولاجاق.
