ابراهیم رشیدی مشکین‌شهر محکمه‌‌سینه چاغیریلیب
مشکین‌شهرده یاشایان مدنی فعال ابراهیم ساوالان (رشیدی) آزربایجان و کیرمان نوماینده‌‌لری آراسیندا موباحیثه‌یه دایر پایلاشدیغی بیر یازی نه‌دنی ایله ۱۶ بهمن ۱۴۰۰-جو ایل شنبه گونو مشکین‌شهر محکمه‌‌سینه چاغیریلیب.
بو مدنی فعالین اینستاگرام صفحه‌‌‌سینده یئر‌لشدیریلمیش خبره گؤره، ابراهیم ساوالان ۱۴ بهمن جوما آخشامی گونو مشکین‌شهر فتا پولیسینه چاغیریلیب و سونگونون میس معدنینه گؤره آذربایجان و کیرمان نوماینده‌‌لری آراسیندا موباحیثه‌یه دایر مقاله‌نین درجی ایله باغلی دیندیریلیب.
او، آزربایجان و کیرمان نوماینده‌‌لری آراسیندا سونگونون میس معدنی اوزرینده موباحیثه ایله باغلی مقاله‌سینده، مشکین‌شهرین ایکی کندی‌نین (آللی و ساروانلار) کئچمیش حادثه‌‌‌لرینی میثال چکدیکدن سونرا، آللی شوراسی‌نین بعضی عضولری بیر دیلکچه ایله ساوجیدان جناب رشیدی حاققیندا شیکایتده بولونماسینی ایسته‌میشدیلر.
بو مدنی فعال دونن مشکین‌شهر فتا پولیسینه گئتدیکدن سونرا دیندیریلیب و پرونده‌سی مشکین‌شهر محکمه‌‌سی‌نین ایکینجی شؤبه‌سینه وئریلیب.
جناب رشیدی دونن اینستاگرام صفحه‌‌‌سینده یازمیشدی: اؤنجه‌کی چاغیریشدان سونرا بو سحر مشکین فتا پولیسینه گئتدیم. پرونده‌یه باخان شخص، سؤزوگئدن یازی‌نین درج ائتمه‌یین موتیوی و آماجی ایله باغلی بیر سیرا سؤاللار وئریب و دئدی کی، سیزی پرونده ایله بیرلیکده محکمه‌‌یه تحویل وئرمک اوچون الیمیزده محکمه قراری وار.
او، یازیب: منی مشکین محکمه‌‌سی‌نین ایکینجی شؤبه‌سینه وئردیلر، آنجاق موستنطیق اوردا اولمادیغی اوچون محکمه اتورومو باشقا واختا قالدی.
قئید ائدک کی، ابراهیم ساوالان مدنی فعالیتلرینه گؤره دفعه‌‌لرله توتولوب، حبس ائدیلیب و ایشگنجه‌لره معروض قالیب.
