نقده‌نین سولاقلاریندا ۲ مین قاناد قوش وار
چینار – نقده‌نین چئوره محافظه‌‌‌سی اداره‌سی‌نین رئیسی دئییب: ۲ میندن چوخ کؤچری قوش دینجلمک و قیدالانماق اوچون بو شهرین سولاق(تالاب)لارینا قونوب.
چینارین وئردییی معلوماتا گؤره اکبر محمدیان نقده‌نین چئوره محافظه‌‌‌سی اداره‌سی‌نین رئیسی بیلدیریب؛ ۲ میندن چوخ کؤچری قوش دینجلمک و قیدالانماق اوچون بو شهرستانین سولاقلارینا دوشوب. بو فصلده قو، فلامینگو، عادی گؤی دیمدیک (اردک سرسفید) و مختلف اؤردک نوعلاری کیمی قوشلار، قیدالانما و قیشلاماق اوچون قوزئی منطقه‌لردن نقده‌نین سولاقلارینا سفر ائدرلر.
او سؤزونه داوام ائتدی: نقده سولاقلاری اؤلکه‌نین نادر سو اکوسیستم‌لریندن بیری اولاراق؛ مختلف قوش نوعلارینین فصلی مهاجرتی و اونلارین یومورتالاما ایله جوجه‌لرین یومورتادان چیخماسی اوچون هر ایل مختلف قوش نوعلارین مهاجرتی‌نین شاهیدی اولور.
نقده چئوره محافظه‌‌‌سی اداره‌سی‌نین رئیسی دئییب: قوزئی منطقه‌لرده هاوانین دوشمه‌سی ایله کؤچری قوشلار تدریجا بو شهرین سولاقلارینا قونوب، قیشین اولینه قدر بو شهرستانین سولاقلاریندا قالاجاقلار.
او، نقده سولاقلاریندا ۴۰-دان چوخ سو و ساحل قوش نوعونون تانینماسینا توخوناراق علاوه ائتدی: حاضیردا کؤچری قوشلاردان باشقا ۱۳ میندن چوخ یئرلی سو و ساحل قوشلاری، او جمله‌‌‌دن فیتچی جوره، آلا اؤردک، تنبل جوللوت، مای‌گولو، قاشقالداق، قیرمیزی باش دالغیج، مجار اؤرده‌یی، یاشیل باش اؤردک، بؤیوک خاللی قارتال، جایداق جوللوت، سو سوپورن و چوخ نادر عادی گؤی دیمدیک‌دیر.
