ستار بهشتی‌نین آناسی بللی اولمایان شخصلرین سالدیریسی سونوجوندا یارالانیب
ستار بهشتی وقفی خبر وئریب کی، ستار بهشتی‌نین آناسی گوهر عشقی اوغلونون مزاری اوزرینه گئدرکن بللی اولمایان شخصلرین سالدیریسینا معروض قالیب و باشیندان و اوزوندن یارالانیب.
حادثه جوما آخشامی، ۱۸ آذر ساعات ۱۱ جیواریندا باش وئریب. بو حادثه‌‌‌ده یئره ییخیلان گوهر عشقی یولدان کئچنلر طرفیندن خسته‌خانایا آپاریلیب.
ستار بهشتی وقفی بو سالدیری‌نین آچیقلاماسیندا بئله یازیب: گوهر عشقی اوغلونون دفن اولوندوغو ایمامزاده‌یه طرف گئدیردی.آرخادان ایکی نفرین میندیغی بیر موتورسیکلت گلیب و موتورسیکلته میننلردن بیری ائندیکدن سونرا گوهر عشقی ایتله‌ییب.
حادثه‌‌‌نین شاهیدی بو حادثه ایله باغلی دئییب: اینسانلار قیشقیریب یاردیم ایسته‌ینده ماغازانین ایچیندیدیم اورایا یاخینلاشاندا ستارین آناسی‌نین قانلی اولاراق یئرده اوزاندیغینی گؤردوم.
بو سالدیریدان سونرا گوهر عشقی یول کنارینداکی دمیرلرین اوستونه ییخیلیب و بیر مدت سونرا هوشدان گئدیب.
ستار بهشتی وقفیندن وئریلن بیلگیلره گؤره، گوهر عشقی بعضی شخصلر طرفیندن خسته‌خانایا آپاریلیب و سطحی موعاینه‌‌دن سونرا ائوه بوراخیلیب.
خانیم عشقی و قیزی “سحر بهشتی” بو ایل ۱۲ آبان چارشنبه گونو ده گوونلیک گوجلری طرفیندن حبس ائدیلیب و بیر نئچه گون سونرا سربست بوراخیلمیشدی.
ستار بهشتی وقفی حبس زامانی گوونلیک گوجلری‌نین ستار بهشتی عائله‌‌‌سینه بئله دئدیگینی یازیب: “هر کس حبس‌خانادا و ایشگنجه آلتیندا اؤلدورولمه‌یه‌جک. بعضیلری قضا، داوا و یا یول قضاسی سونوجوندا اؤلدوروله‌جک“.
