ژورنالیستلرین اتوبوسی فاجعه سینده، اورمیه نین چئوره قوروما مودیرلری گوناهکاردیر!
باتی آذربایجان ایالتی‌نین سولدوز (نقده) شهری‌نین ساوجیسی ایلکین آراشدیرمایا گؤره؛ ژورنالیستلرین اتوبوسونون آشماسی‌نین اساس گوناهکارلاری باتی آذربایجانین چئوره قوروما ایداره‌سی‌نین باش مودیری، اورمیه‌نین چئوره قوروما ایداره‌سی‌نین رئیسی و اورمیه گؤلونون جانلانماسی قرارگاهی‌نین رئیسی‌دیر.
۴ تیر ۱۴۰۰-ده باش وئرن بو حادثه‌‌‌ده چئوره ایله باغلی ژورنالیستلری داشییان اتوبوس آشدی، ایسنا خبر آژانسیندا چالیشان مهشاد کریمی و ایرنا خبر آژانسیندا چالیشان ریحانه یاسسینی آدلی ایکی اکولوژی ژورنالیستی حیاتینی ایتیردی.
۸ آذر ۱۴۰۰-جو ایل آخشام ساعتلاریندا تسنیمه موصاحیبه وئرن سولدوز ساوجیسی “اصغر نوعی قوشچی” دئدی: ایلکین آراشدیرما زامانی ساوجی بئله قناعته گلیب کی، ایالت یئتکیلیلری، او جومله‌‌‌دن باتی آذربایجانین چئوره قوروما ایداره‌سی‌نین باش مودیری، اورمیه‌نین چئوره قوروما ایداره‌سی‌نین رئیسی و اورمیه گؤلونون جانلانماسی قرارگاهی‌نین رئیسی ژورنالیستلر اوچون اویغون اتوبوس آیارلامادیقلاری اوچون سوچلودولار. بو مسئله اورمیه عدلیه‌سی‌نین صلاحیتینده اولدوغونو نظره آلاراق، آراشدیرمانین اورمیه‌ده داوام ائتدیریلمه‌سی اوچون پرونده ایالت مرکزینه گؤندریلیب.
داها اؤنجه اتوبوسدا اولان ژورنالیستلردن بیری ژورنالیستلیک جینایت دگیله دئمیشدی: اتوبوسون دورومو چوخ دهشتلی و چرکلی ایدی. قول دایاقلاری سینمیشدی، گوونلیک کمری یوخ ایدی، دامی دئشیلیب و چوخلو پروبلئملری واردی. ایش او یئره چاتیب کی، اوشاقلار شوخلوقلا دئییرمیشلر بیزی اؤلدورمک اوچون گتیردیلر؟ سوروجونون ماشینی یاواش سورمه‌سی‌نین و ۲ ساعتدان ۴ ساعتا قدر یول گئتمه‌سی‌نین سببلریندن بیری ده یقین کی، اتوبوسون تئکنیکی دورومو، او جومله‌‌‌دن ایلج سیستمی‌نین اولماماسیندان خبردار اولماسیدیر. بونا گؤره ده ژورنالیستلرین پروقراملا سوروجونون سرعتی ایله باغلی تخمینلری ساعتدا تخمیناً ۶۰ کیلومتر ایدی حال بو کی او ساعتدا ۸۰ و یا ۹۰ کیلومتر سرعتله گئده بیلیردی.
