باتی آذربایجانین دورومو هله‌ده کریتیکدیر؛ ۶-جی دالغا باش وئره بیلر
باتی آذربایجان طب علملری بیلیم‌یوردونون رئیسی، ایالتده کرونا ویروسو دورومونون هله ده کریتیک اولدوغونو و آشیلامانین آرتماسینا باخمایاراق ایالتده‌کی ۳ شهرین قیرمیزی اولدوغو و ۶-جی دالغا احتیمالی‌نین یوکسک اولدوغونو بیلدیردی.
جواد آقازاده، ایالتده کرونا خسته‌لیگی سببییله خسته‌خانایا یئر‌لشدیریلمه‌نین سون ۲۴ ساعت ایچینده ۱۵۷ نفر اولدوغونو ایفاده ائتدی.
او داوام ائتدی: حال حاضردا، ۱۰۷۱ کووید ۱۹ خسته‌سی ایالتین طب مرکزلرینده خسته‌خانایا یئر‌لشدیریلیب، اونلاردان ۲۴۴ نفری اؤزل باخیم شؤبه‌سینده موعالیجه اولونور و ۴۷ خسته ونتیلاتورا باغلیدیر.
سون ۲۴ ساعت ایچینده اورمیه ۴۵ نفر، خوی ۳۰ نفر و نقده ۱۷ نفر اولماقلا باتی آذربایجاندا ان چوخ خسته‌نین طب مرکزینه یاتیریلدیغی شهرلر آراسیندادیر.
باتی آذربایجان طب علملری بیلیم‌یوردونون رئیسی آرتیردی سون ۲۴ ساعتدا ایالتده ۱۵ خسته حیاتینی ایتیریب.
بو رقمین علاوه ائدیلمه‌سی ایله ایالتده کروناویروسدان اؤلنلرین توپلام سایی ۶ مین ۸۶۲ نفره چاتدی.
اونون دئدیگینه گؤره ایندییه قدر باتی آذربایجاندا بیرینجی و ایکنیجی دوز آشی اولماقلا توپلام ۳ میلیون ۳۹۵ مین دوز کرونا آشیسی وورولوب.
