بورس تشکیلاتیندا کریپتو وارلیق معدنچیلیگی؛ باش مودیر ایستعفا وئردی
تهران بورسونون بیناسیندا دیجیتال ارز چیخارما جیهازلاری‌نین تاپیلماسی‌نین آردیندان بو شرکتین باش مودیری ایستعفا وئردی.
ایران مئدیاسی‌نین خبرلرینه گؤره، ۷ مهر ۱۴۰۰ چارشنبه گونو، تهران بورسونون باش مودیری علی صحرایی، ایستعفاسی‌نین “تهران بورسوندا سرمایه بازاری‌نین ثابتلیگی ایستیقامتینده کریپتو وارلیق چیخاریلماسی مؤوضوسوندا داها چوخ آراشدیرما اوچون بیر فورصت یاراتماق” مقصدلی اولدوغونو سؤیله‌دی و ایستعفاسینی تهران بورس شرکتی‌نین ایداره هئیتینه وئردی و بو ایداره هئیتی‌نین تصدیقی ایله موشایعت اولوندو.
ایرنا خبر آژانسی‌نین یایدیغی بیر خبره گؤره، علی صحرایی “ایشدن چیخاریلیب“.
بو خبر آژانسی اونون واریثینی “محمود گوودارزی” اولاراق بیلدیریب.
سون گونلرده بورس تشکیلاتی بو باره‌ده آچیقلادی “تهران بورسو طرفیندن بیر سیرا معدنچیلیک جیهازی ایستیثمار ائدیلیب.”
بورس تشکیلاتی‌نین یایدیغی آچیقلامادا دئییلیر “فعالیتین شرکتین راپورلاریندا تام اولاراق قئید ائدیلمه‌دیگی و آچیقلانمادیغی اورتایا چیخدی.”
بو باره‌ده تشکیلات دئییب “بئله بیر شئی نیظام‌نامه‌‌یه و بورس شرکتی‌نین هدفینه اویغون دئییلدی” و نتیجه‌ده مسئله تشکیلاتین حوقوقی معاونینه گؤندریلدی.
بورس تشکیلاتی‌نین خالق ایله ایلیشگیلرینه گؤره، تهران بورس شرکتی ۱۳۹۹ -جو ایلین باشلاریندان بیر آراشدیرما پروژه‌سی اولاراق کریپتو وارلیقلارین چیخاریلماسی و اونلارین ROI نیسبتلری‌نین حسابلانماسی اوچون R&D [گلیشتیرمه و آراشدیرما] پلانینی حیاتا کئچیردی، لاکین بو فعالیت همین ایلدن قیسا مدت سونرا دایاندی.
راپورلار گؤستریر کی، ایرانین دونیادا بیتکوین معدنچیلیگینده‌کی پایی تخمیناً 4،6 فایزدیر.
iranwire
