رشت جوما ایمامی: دونیا “کوو ایران برکت” آشیسینی ساتین آلماغا هوجوم ائده‌جک
رشت جوما ایمامی، وطنداشلار اوچون آشی چاتیشمازلیغینا اعتراض ائدن اینسانلاری یارا اوزرینده میلچک آدلاندیردی.
ایسلام جمهورییتی لیدری‌نین گیلانداکی نوماینده‌‌سی رسول فلاحتی، خاریجی منبع‌لردن آشی آلینماسینا ایشاره ائده‌رک دئدی: “بعضیلری ایسلام رژیمی‌نین باشلادیغی گوندن بری اونا قارشیدیلار و یارا اوستونده‌کی میلچک کیمیدیلر، آمّا ایسلام جمهورییتی بوتون گوجویله اینسانلارین احتیاج دویدوغو آشیلاری ایدخال و تداروک ائتمکده‌دیر.”
ایسلام جمهورییتی ایندییه قدر تخمیناً ۲۵ میلیون دوز کرونا آشیسی ایدخال ائده بیلدی. بو آرادا ایران وطنداشلارینی آشیلاماق اوچون ۱۰۰ میلیون دوزدان چوخ آشی لازیمدیر.
علی خامنه‌ای‌نین گیلانداکی نوماینده‌‌سی، سؤزلری‌نین بیر حیصه‌‌‌سینده ایمامین امری‌نین ایجرا قرارگاهی طرفیندن حاضرلانان “کوو ایران برکت” آشیسی اورتیمینه ایشاره ائده‌رک دئدی: “البته کی، گله‌جکده دونیا بو آشینی آلماق اوچون هوجوم ائدیب و اونو بیزدن ساتین آلاجاق.”
ایران جمهورباشقانی ابراهیم رئیسی‌یه گؤره، آشینین یئرلی اورتیمی ایران خالقی اوچون یئترلی دئییل و او، بو یاخینلاردا ۳۰ میلیون دوز آشی ایدخال ائتمه‌یه چالیشدیقلارینی آچیقلادی.
حاضردا ابراهیم رئیسی‌نین بیرینجی معاونی اولان ایمامین امری قرارگاه رئیسی محمد مخبر، داها اؤنجه شهریورین سونونا قدر ایسلام جمهورییتی لیدرینه ۵۰ میلیون آشی وعد ائتمیشدی، آنجاق بیر آی ایچینده آشی اورتن داخیلی شرکتلرین کوتلوی آشی اورتیمی ایمکانلاری‌نین اولمادیغی بیلدیریلدی.
رسول فلاحتی اون ایکینجی حؤکومتی تنقید ائده‌رک دئدی: “اون اوچونجو حؤکومت کؤهنلمیش و آز ایشله‌ین بیر حؤکومتی میراث آلیر و اؤنجه‌کی حؤکومتین کادر و یئنیدن‌قورما ایشلری آپارمادیغینی نظره آلساق، یئنی حؤکومت اوچون پروبلئملرین درینلیگی بؤیوکدور“.
iranwire
