علیرضا زالی: کرونا اؤلوملرینی دونیا ساغلیق تشکیلاتیندان گیزلتدیک
تهرانین کرونایا قارشی موباریزه قرارگاهی‌نین رئیسی ایراندا کرونادان اؤلنلرین سایی‌نین دونیا ساغلیق تشکیلاتیندان گیزله‌دیلدیگینی بیلدیردی و دئدی کی، اؤلکه‌ده ویروسون یاییلماسی‌نین باشلانغیجیندا، دونیا ساغلیق تشکیلاتی‌نین اوزمانلاری ایرانا گلنده، اونلاردان مئدیادا ایرانین ساغلاملیق سیستمینی مدح ائتمه‌لرینی ایسته‌دیک.
“علیرضا زالی”، ۲۰ مرداد ۱۴۰۰، چارشنبه گونو، ایراندا کرونا آشیسی‌نین یالنیز بئش گونلوک رزئروی‌نین اولدوغونو قئید ائده‌رک دئدی: “قومدا ایلک کرونا حادثه‌‌‌سی موشاهیده ائدیلدیکده، قومون قرنطینه‌سی‌نی ایسته‌دیم و قومداکی سئچکیلری دایاندیرماغی سؤیله‌دیم، آما بعضیلری منی بوسؤزومو گولونج آدلاندیردیلار بو خسته‌لیگی آسانلیقلا ایداره ائده بیله‌جه‌ییمیزی دئدیلر.”
او داوام ائتدی: “اولوسلاراراسی یاردیملار و سرحدسیز حکیملری هاوا لیمانیندان ویروس حاقیندا چوخ بیلگیمیز اولمادیغی حالدا گئری قایتاردیق و اولوسلاراراسی مصلحتلردن ایستیفاده ائتمه‌دیک.”
زالی اؤنوموزده‌کی هفته‌لرده داها آجی خبرلر و داها پیس شرطلری اؤن گؤردو و دئدی: “دلتا هیندیستاندا اوچ آی داوام ائتدی. هامینی تئز آشیلادیلار. آشینین قیمتینه گؤره ناراحات اولمامالیییق. حتی ایکی قات قیمته آلیب اینسانلارا آشی وورمالیییق. ۷۲۰ میلیون یورو رمدسیویر اوچون خرجله‌دیک و بو پولو آشییا خرجله‌ممیز لازیمدی. نئجه اولا بیلر کی، نفت آوادانلیغینی قیمتدن اوچ قات باها آلاق، آما آشیلاری یوخ؟“
او اؤلکه‌نی مؤوجود وضعيتدن خلاص ائتمه‌یین تک یولونو بو گوندن اعتباراً ایکی هفته‌لیک تام قرنطینه اولاراق ایضاح ائتدی و عینی زاماندا ایسلام جمهورییتی‌نین آشی تعمین ائتمک چابالارینی ایضاح ائتدی: “خاریجده‌کی سفیرلریمیز آشی اوچون باشوورماییبلار. ژاپن سفیری ایله دانیشدیم و او دئدی کی، ایران سفیری آشی اوچون باشوورمادی. بو نئجه بیر دیپلوماسیدیر؟“
رسمی ایستاتیستیکایا گؤره، هر گون ان آز ۵۰۰ نفر کرونا خسته‌لیگیندن اؤلور و هر گون آلینان ۲۶۰ مین تستدن ۴۰ مینیی موثبت اولور.
iranwire
