ملت وکیلی: کئچمیش جمهورباشقانلاری‌نین امک‌لیلیک معاشی آیدا ۳۵۰ میلیون تومندیر
ایسلامی شورا مجلیسی‌نین حوقوق کمیسیونونون عضوو حسن نوروزی ایراندا کئچمیش جمهورباشقانلاری‌نین هر آی ۳۵۰ میلیون تومن معاش آلدیغینی بیلدیریب.
۱۵ مرداد ۱۴۰۰ جوما گونو حسن نوروزی، مقاملارین معاشلاری‌نین حاقسیز اولاراق آرتیریلماسینا ایشاره ائده‌رک دئدی: “جمهورباشقانی‌نین امکلیلیگه آیریلماسیندان سونرا آیدا ۳۵۰ میلیون تومن معاش آلماسی یانلیشدیر. آنجاق ۲۵-۳۰ میلیون اولسایدی، هئچ بیر پروبلئم یوخدور.”
ایسلام جمهورییتی‌نین یوکسک سیاسی و حربی مقاملاری‌نین، او جومله‌‌‌دن علی خامنه‌ای‌نین معاش و موکافاتلاری‌نین میقداری هئچ واخت آچیقلانمیر.
علی خامنه‌ای‌نین بعضی یاخینلاری، او جومله‌‌‌دن غلامعلی حداد عادل، ایسلام جمهورییتی‌نین لیدری‌نین تهرانین گونئیینده بیر ائوده کیرایه‌‌‌ده یاشادیغینی ادعا ائتمیشدی.
بونونلا بیرلیکده، ۱۳۹۳-جو ایل رویترز بیر آراشدیرما راپوروندا، ایسلام جمهورییتی‌نین لیدری‌نین الینین آلتیندا اولان ایمام خمینی امری‌نین ایجرا قرارگاهی کیمی بؤیوک فعالیتلری ایله خامنه‌ای‌یه مستقل ماليه منبعیی اولان بؤیوک بیر اقتصادی کومپلئکس حاقیندا بیلگی وئردی.
بو آیرینتیلی راپوردا قرارگاهین وارلیقلاری‌نین ديری تخمیناً ۹۵ میلیارد دلار اولدوغو تخمین ائدیلدی.
ملت وکیللری‌نین گلیرلری ده سون ایللرده آرتیب و بئش ایل اؤنجه‌یه گؤره ایکی قات یاریم آرتیب. ملت وکیللری آیلیق معاشلارینا علاوه اولاراق منزیل، اوفیس، سوروجو و اتومبیل خرجلری ده آلیرلار.
ایندیکی مجلیسین باشلاریندا رفسنجانین ملت وکیلی حسین جلالی اؤزونون و باشقا ملت وکیللری‌نین ۲۳۱ میلیون تومن معاش آلدیقلارینی بیلدیردی و توییترده یازدی: “ایلک نوماینده‌‌لیک حاقی (۱۱ میلیون تومن) آیریجا ۲۰۰ میلیون تومن منزیل حاقی و باشقا خرجلر اوچون ۲۰ میلیون تومن حسابیمیزا کؤچورولدو.”
iranwire
