ایران، اوکراینا اوچاغی‌نین وورولماسی ایله باغلی کانادانین داورانیشینی اوتانماز آدلاندیردی
خاریجی ایشلر ناظرلیگی‌نین سؤزچوسو سعید خطیب‌زاده، کانادا محکمه‌‌سی‌نین اوکراینا اوچاغی‌نین اینقیلاب کئشیکچیلری طرفیندن وورولماسی ایله باغلی قرارینی “سیاسی” و “اساسسیز” آدلاندیردی و کانادانین اوچاغین وورولماسی قونوسونداکی داورانیشی‌نین “اوتانماز” آدلاندیردی.
۳۰ اردیبهشت ۱۴۰۰ جوما آخشامی، کاناداداکی انتاریو ایالتی‌نین عالی محکمه‌‌سی، اوکراینا اوچاغی‌نین ایسلام اینقیلابی کئشیکچیلری طرفیندن وورولماسی‌نین قصداً و ترروریستی اولدوغونا قرار وئردی.
قرارا موناسیبت بیلدیرن سعید خطیب‌زاده، کانادا محکمه‌‌سی‌نین، اراضیسیندن کناردا باش وئرمیش بیر حادثه‌‌‌ده اوچاق قضاسی و یا اِحتیمال ائدیلن بیر قوصور ایشینه باخما صلاحیتی‌نین اولمادیغینی سؤیله‌دی.
او محکمه‌‌نین استناد ائتدیگی داخیلی قانونون دا قانونی پرینسیپلره ضد اولدوغونو و اصلینده کانادانین اولوسلاراراسی عهده‌‌لیکلرینی پوزدوغونو ادعا ائتدی.
انتاریو عالی محکمه‌‌سی بو قراری ایکی اوزمانین گؤروشونه گؤره وئردی. اوزمانلاردان بیری محکمه‌‌ده اینقیلاب کئشیکچیلری‌نین اوچاغین سیویل اولدوغوندان خبردار اولدوغونو و اونو وورماق مقصدی ایله راکت آتدیغینی وورغولادی.
ایران خاریجی ایشلر ناظرلیگی‌نین سؤزچوسو، کانادانین اوکراینا اوچاغی‌نین وورولماسیندا داورانیشینی “اوتانماز” آدلاندیردی و علاوه ائتدی: “کانادالی بیر حاکمین سیاسی سیفاریش اوزره قراری، قانون اؤلکه‌سی اولدوغونو ادعا ائدن بیر اؤلکه اوچون آییبدیر.”
او کانادا حؤکومتی‌نین حرکتلرینی “سیاسی‌لشدیریلمیش” و محکمه‌‌لری‌نین آمریکا محکمه‌لرینی “تعقیب” ائتدیگینی سؤیله‌دی.
انتاریو عالی محکمه‌‌سی، قوربانلارین بیر نئچه عائله عضوونون شیکایتیندن سونرا اوکراینا اوچاغی‌نین وورولماسی‌نین قصداً و ترروریستی اولدوغونا قرار وئردی.
اینقیلاب کئشیکچیلری، علی خامنه‌ای، محمدحسین باقری، علی شمخانی، حسین سلامی، عبدالرحیم موسوی و امیرعلی حاجی‌زاده بو پرونده‌نین موتهیملریدیلر.
iranwire
